Tags-Dhoop

chashm-e-tamāshā bhī sharminda hairat meñ ā.īne bhī
vaqt kī dhuup ne kaisā kaisā chehroñ ko jhulsāyā hai

paanī ne jise dhuup kī miTTī se banāyā
vo dā.era-e-rabt bigaḌne ke liye thā

kaḌī ho dhuup to do phuul pyaar ke hañs kar
tapsīda rāhoñ meñ shāḳh-e-shajar banāte haiñ

akelā dhuup ke lashkar meñ ghir gayā pāgal
jo sochtā thā koī sā.ebān niklegā

ham amaañ paate the jis ke saa.e meñ
vo shajar ab dhuup kī tasvīr hai

vo zulf dhuup meñ furqat kī aa.ī hai jab yaad
to bādal aa.e haiñ aur shāmiyāne ho ga.e haiñ

bastī bastī parbat parbat vahshat kī hai dhuup 'ziyā'
chāroñ jānib vīrānī hai dil kā ik vīrāna kyā

raat kī chādar tah hone tak dhuup kā jaadū khulne tak
darvāze ke band kivāḌoñ se ik baat chhupānī hai

uḌ gayā to shāḳh kā saarā badan jalne lagā
dhuup rakh lī thī parinde ne paroñ ke darmiyāñ

sub.h-e-azal kā ruup ki shām-e-abad kā giit
saaya ho dhuup ho ki gumāñ kuchh na kuchh to ho

sub.h uThte hī maiñ kuchh dhuup bharuñgā in meñ
ḳhvāb dekheñ haiñ to āñkhoñ kī namī ḳharch huī

phir us ke ba.ad vahī dhuup hai mashaqqat kī
zarā sī der ko hai ḳhvābnā.e āḳhir-e-shab

shabnamī meñ dhuup kī jaise vatan kā ḳhvāb thā
log ye samjhe maiñ sabze par paḌā sotā rahā

maiñ dhuup meñ kyuuñ kisī kā ehsānmand hotā
ḳhud apne saa.e ko kar liyā sā.ebān maiñ ne

maiñ jal ga.ī huuñ dhuup kī kirnoñ se jā-ba-jā
aur vo samajh rahe haiñ ki rañgat nikhar ga.ī

vaqt kī dhuup meñ ham sāya-e-hasrat ban kar
do ghaḌī kū-e-tamannā meñ na chalne paa.e

dīvār hai gum-sum dar tanhā phir hote chale haiñ shajar tanhā
kuchh dhuup sī Dhaltī jaatī hai kuchh saa.e utarte jaate haiñ

ga.ī chhāñv us teġh kī sar se jab kī
jale dhuup meñ yaañ talak ham ki tab kī

sa.i-e-sahrā-e-vafā sair-e-gulistāñ kab thī
dhuup hī dhuup thī har-sū koī saayā kab thā

maiñ to har dhuup meñ sāyoñ kā rahā huuñ juuyā
mujh se likhvā.ī sarāboñ kī kahānī tum ne