Tags-Dhoop

girāñ huī thī ġham-e-zindagī kī dhuup magar
kisī kī yaad ne ik shāmiyāna taan liyā

maiñ zamāne kī kaḌī dhuup kā maarā huuñ 'zafar'
tum jahāñ ho chamanistāñ hai qarīb aa jaao

dhuup kā dariyā umaD aatā hai jab chaḌhtā hai din
koī aisī lahr kyā us kī bhī añgḌā.ī meñ hai

rāste dauḌe chale jaate haiñ kin samtoñ ko
dhuup meñ jalte rahe saa.e bichhā.e ga.e ham

jo dhuup ban ke chamak jaatī dil ke āñgan meñ
tirī nazar kī vo rañgīñ kiran nahīñ aa.ī

abr uTThe to simaT jā.ūñ tirī āñkhoñ meñ
dhuup nikle to tire sar kī ridā ho jā.ūñ

dhuup phailī to kahā dīvār ne jhuk kar mujhe
mil gale mere musāfir, mere saa.e ke habīb

paañv bilkul nahīñ jaleñge phir
dhuup ke sāmne shajar rakhiye

dhuup ke bādal baras kar jā chuke the aur maiñ
oḌh kar shabnam kī chādar chhat pe soyā raat bhar

kabhī to chashm-e-falak meñ hayā dikhā.ī de
ki dhuup sar se haTe aur ghaTā dikhā.ī de

qatra qatra chhat se hī risne lagī
dhuup kā rasta na thā dīvār meñ

din bhar ġhamoñ kī dhuup meñ chalnā paḌā mujhe
rātoñ ko sham.a ban ke pighalnā paḌā mujhe

ik pal kī dauḌ dhuup meñ aisā thakā badan
maiñ ḳhud to jāgtā huuñ magar so gayā badan

us se ham chhāñv kī ummīd bhalā kyā rakkheñ
dhuup detā hai hamesha ye shajar kaisā hai

jab bhī thakan ne kaaT ke pheñkā dasht-gazīda qadmoñ ko
jaltī ret pe khaal bichā.ī dhuup kā ḳhema taan liyā

safar meñ dhuup to hogī jo chal sako to chalo
sabhī haiñ bhiiḌ meñ tum bhī nikal sako to chalo

in āñkhoñ ne jo kuchh dekhā kaun use sach mānegā
vaqt kī dhuup meñ chāñd sā chehra kaise suno laayā logo

surma.ī dhuup meñ din sā nahīñ hone paatā
dhund vo hai ki ujālā nahīñ hone paatā

laboñ par tabassum to āñkhoñ meñ aañsū thī dhuup ek pal meñ to ik pal meñ bārish
hameñ yaad hai bātoñ bātoñ meñ un kā hañsānā rulānā rulānā hañsānā

dhuup ranjish kī tarah phail rahī hai mujh meñ
kyā kahūñ tujh se mire saa.e meñ aa.e hue shaḳhs