Tags-Dhoop

apne sūraj kī tamāzat kā bharam rakhne ko
narm chhāñv meñ kaḌī dhuup milā lī maiñ ne

dhuup bolī ki maiñ ābā.ī vatan huuñ terā
maiñ ne phir sāya-e-dīvār ko zahmat nahīñ dī

khā lo pī lo 'ashk' na jaane kis pal dhuup Dhale mele meñ
kis pal taarā chhiTke kis pal sūraj Duub chale mele meñ

dhuup bechtā huuñ maiñ din meñ aa gayā huuñ maiñ
chāñd ke savād meñ ek shab guzār kar

dhuup utrī to simaTnā paḌā ḳhud meñ us ko
ek saaya ki jo thā apne shajar se ūñchā

ajiib rañg tire husn kā lagāv meñ thā
gulāb jaise kaḌī dhuup ke alaav meñ thā

ye haal hai to badan ko bachā.iye kab tak
sadā meñ dhuup bahut hai lahū meñ lū hai bahut

hameñ bhī hai to ḳhabar dhuup chhāñv kī 'at.har'
ki ham ne bhī to koī zindagī basar kī hai

rakh gayā vo apne kapḌe sūkhne
dhuup bhī kitnī suhānī kar gayā

kisī kī yaad se is umr meñ dil kī mulāqāteñ
ThiThurtī shaam meñ ik dhuup kā konā zarūrī hai

qahqahoñ kī dhuup meñ baiThe the mere saath sab
āñsuoñ kī bārishoñ meñ par koī bhīgā na thā

kyuuñ na phir dhuup bhī ban jaa.e ghaTā jab ham par
aap kā sāya-e-mizhgān huā jaatā hai

tū ne dekhā hai kabhī dard ke sahrāoñ meñ
dhuup baḌhne lage tab saath badal jaate haiñ

maiñ saath apne hī saa.e kā chhoḌ duuñ na kahīñ
ki sar pe dhuup ġhamoñ kī uThā rahā huuñ abhī

balā kī dhuup thī saarī fazā dahaktī rahī
magar vafā kī kalī shāḳh par chaTaktī rahī

inhī hairat-zada āñkhoñ se dekhe haiñ vo aañsū bhī
jo aksar dhuup meñ mehnat kī peshānī se Dhalte haiñ

raah meñ chāhe dhuup kaḌī ho yā saa.e bāheñ phailā.eñ
jin kā kaam guzarnā hai vo log guzarte rahte haiñ

rañg-e-shafaq kī dhuup khilī thī qadam qadam
maqtal meñ sub.h-o-shām kā manzar judā na thā

ujlī dhuup hai
farsh-e-giyah par

gavārā kab hai mamtā ko mirā yuuñ dhuup meñ chalnā
mirī maañ oḌhnī phailā ke ik chhātā banātī hai