Tags-Dhoop

vaise to un ko saa.e se uljhan balā kī thī
momī badan the dhuup kī nafrat meñ aa ga.e

tere liye vo dhuup kā TukḌā rahā rahe
mere liye to aag sī barsī zamīn par

oḌh letī hai mujhe sard fazā kī devī
karb kī dhuup meñ taptī huī chādar huuñ maiñ

tum saath ho to ham bhī bayābāñ ko ghar kareñ
ye saḳht dhuup sāya-e-dīvār sī lage

kahāñ ruke the vo kyā shajar the ki jin ke saa.e meñ ham khaḌe the
vo dhuup kaisī thī jis kī bārish se mere sahrā hare hue haiñ

dhuup baTorā karte the ham saarā din
shaam ko baañT ke ghar le jaayā karte the

ek din vo zarroñ ko āftāb kar leñge
dhuup ke jo ḳhvāhāñ haiñ raat ke añdhere meñ

uglegā āftāb kuchh aisī balā kī dhuup
rah jā.eñge zamīn pe kuchh daaġh chhāñv ke

ḳhirad yaqīñ ke sukūñ-zār kī talāsh meñ hai
ye dhuup sāya-e-dīvār kī talāsh meñ hai

ajiib shaḳhs hai vo pyaas ke jazīroñ kā
pahan ke dhuup sadā maqtaloñ meñ rahtā hai

use bhī hādisa kahiye ki ḳhushk dariyā par
paḌī jo dhuup to patthar pighal ke bahne lage

kis ne sahrā meñ mire vāste rakkhī hai ye chhāñv
dhuup roke hai mirā chāhne vaalā kaisā

jo talab chāñdnī rātoñ meñ bhaTaktī hī rahī
ab use dhuup kī chādar meñ sulā rakkhā hai

ham faqīroñ kā pairahan hai dhuup
aur ye raat apnī chādar hai

saarā badan hai dhuup meñ jhulsā huā magar
dil par jo paḌ rahā hai vo saaya ajiib hai

meñ jāntā huuñ bahut saḳht dhuup hai lekin
safar meñ huuñ to saf-e-rah-ravāñ meñ rahnā hai

vo dhuup meñ nikhrā huā billor sā paikar
chāñdī sā chamaktā huā dīdār kā rishta

isī qadar hai hayāt o ajal ke biich kā farq
ye ek dhuup kā dariyā vo ik kināra-e-shām

jo terī zulf ke saa.e meñ chand din guzre
vo ġham kī dhuup meñ yaad aa.e sā.ebāñ kī tarah

kisī ne kyuuñ mire qadmoñ tale bichhāyā hai
vo rāsta ki kahīñ dhuup hai na saayā hai