Tags-Dhoop

pī luuñ zarā sī aag taḳhayyul uñDel kar
kuchh dhuup chhānñā hai ġhazal ke naqāb se

us din añdherī galiyoñ meñ hogā tulū-e-din
jis roz dhuup chhīnoge tum āftāb se

ye ḳhvāhisheñ ye jehd-e-musalsal ye dauḌ-dhūp
naqsh-o-nigār-e-zīst banāne kī aarzū

sahrā ki saḳht dhuup meñ jalte hue badan
bār-e-ġham-e-hayāt uThāne ki aarzū

mirī zindagī kaḌī dhuup meñ to kaTī magar
mirī chhāñv sā koī sā.ebāñ bhī kahīñ milā

vo jahāñ par pighal rahī hai dhuup
haañ vahīñ sā.ebān hai shāyad

mire ḳhalvat-kade ke raat din yūñhī nahīñ sañvre
kisī ne dhuup baḳhshī hai kisī ne chāndnī dī hai

dhuup kī saḳhtī to thī lekin 'farāz'
zindagī meñ phir bhī thā saaya bahut

dhuup meñ jalnā hai us ko jo shajar ban ke jiye
us ke saa.e meñ rahe ḳhush ye zamāna saarā

āj-kal penciloñ se kāġhaz par
dhuup meñ roTiyāñ banātā huuñ

dhuup meñ saath khaḌe hone vāloñ kī ḳhushbū
dil ke andar rach jaatī hai

kis kā ye ehsās jaagā dopahar kī dhuup meñ
DhūñDne niklā hai nañge paañv nañge-sar mujhe

rūp-nagar ko chhoḌ ke jab se ās-nagar ko aa.e haiñ
sahrā sahrā dhuup kaḌī hai peḌ na koī saa.e haiñ

apnī ḳhvāhish meñ jo bas ga.e haiñ vo dīvār-o-dar chhoḌ deñ
dhuup āñkhoñ meñ chubhne lagī hai to kyā ham safar chhoḌ deñ

pūchhte kyā ho milā kaise ye jañgal ko tilism
chhāñv meñ dhuup kī rañgat ko milāne se milā

jaatī hai dhuup ujle paroñ ko sameT ke
zaḳhmoñ ko ab ginūñgā maiñ bistar pe leT ke

chilchilātī dhuup sar par aur tanhā aadmī
aah ye ḳhāmosh patthar aur tanhā aadmī

jab se dekhā hai khetoñ meñ maiñ ne zālim dhuup kā ruup
tab se terī zulf kā saaya duur bahut hī duur huā

kuchh aur tez ho ga.ī lamhoñ kī saḳht dhuup
Thahre jahāñ bhī sāya-e-dīvār dekh kar

hausle dhuup ne kiye paspā
jism lambe safar se TuuT ga.e