Tags-Dhoop

dhuup chhat par havā ho kamre meñ
lawn meñ shoḳh titliyāñ rakhnā

raas aatī hai unheñ dhuup jo sahrā.ī haiñ
kyoñ unheñ sāya-e-dīvār pe tolā jaa.e

maiñ ne lamhoñ meñ guzārī haiñ hazāroñ sadiyāñ
vaqt kī dhuup meñ pighlā huā dariyā dekhā

tire dayār meñ kyā tez dhuup thī lekin
ghane daraḳht bhī kuchh kam na the ḳhayāl sā hai

chilchilātī huī dhuup kī aañch meñ yuuñ jhulasnā to apnā muqaddar rahā
zehn meñ narm-o-nāzuk ghanī chhāñv se tere āñchal magar sarsarāte rahe

jafā kī dhuup meñ guzrī hai zindagī saarī
vafā ke naam pe jheleñge ġham to kyā hogā

āñkheñ jo band kiiñ to vo ubhre haiñ āftāb
bāhar kī dhuup se na rahā vāsta koī

shāyad mirī talāsh meñ utrī hai charḳh se
jo dhuup paḌ rahī hai mire sā.ebān par

hunar ko dhuup jañgaloñ kī muskurāhaToñ meñ hai
gulāb bastiyoñ meñ hañste rahne kā kamāl kyā

masāfatoñ meñ dhuup aur chhāñv kā savāl kyā
safar hī shart hai to phir uruuj kyā zavāl kyā

ḳhvāhisheñ saaya saaya bikhrī haiñ
aur maiñ dhuup ke makān meñ huuñ

rāh-rau bach ke chal daraḳhtoñ se
dhuup dushman nahīñ hai saa.e haiñ

kuchh log dhuup piite haiñ sāhil pe leT kar
tūfān tak agar kabhī is kī ḳhabar ga.ī

kal tak jo harā peḌ thā kyuuñ suukh gayā hai
jab dhuup kā mausam kisī giile ke liye thā

apnā saaya use ḳhairāt meñ de aayā huuñ
dhuup ke Dar se jo lipTā rahā din bhar mujh se

rahrav-e-manzil-e-hastī huuñ maiñ ai yād-e-habīb
dhuup meñ mere liye sāya-e-dīvār na ban

duur hai sūraj 'alīnā' phir bhī us kī dhuup se
barf kī chādar meñ lipTā tan pighal jaatā hai kyuuñ

ek to ḳhvāb Darāte haiñ mujhe
dhuup meñ zard daraḳhtoñ pe khile kaale phuul

ḳhud par hamāre jism kī chādar hī Daal le
bach aap apnī dhuup se tere badan kī ḳhair

haT ke chaltī hai tere paikar se
dhuup kartī hai ehtirām tirā