Tags-Dhoop

ātishīñ dhuup se miltī hai kabhī jis ko numū
vahī paudā kabhī bārish se jhulas jaatā hai

utartī zehan meñ bhī ḳhush-gavār dhuup kabhī
shurū-e-garmā ke khulte hue dinoñ kī tarah

chale jo dhuup meñ manzil thī un kī
hameñ to khā gayā saaya shajar kā

vo dhuup dushman-e-jāñ thī so thī ḳhamosh the ham
ye chāndnī hameñ Dastī hai kyā kahā jaa.e

pahle-pahal milī thī hameñ shiddatoñ kī dhuup
ab yuuñ hai rābte kī sarā.e meñ shaam hai

mujhe to dhuup ke mausam qubūl the lekin
ye saayā kis ne mirī dopahar meñ rakkhā hai

muġhālate meñ na rahiyegā kam-nigāhī ke
hamārā chashma nazar kā nahīñ hai dhuup kā hai

jabr kī dhuup se taptī saḌkeñ
log chalte nahīñ dekhe jaate

chehra-kushā huā hai koī gesuoñ ke beach
lagne lagī hai dhuup bhī chhāñv ke saath saath

rahoge chāñd kī sargoshiyoñ se bhī mahrūm
kisī se dhuup kā jaltā kalām mat lenā

husn kī dhuup meñ nikhrā huā phūloñ sā badan
dil ke luT jaane kā is ko hī sabab kahte haiñ

raah kī dhuup se mafar hī nahīñ
ham jahāñ haiñ vahāñ shajar hī nahīñ

lahad meñ gire jab huā sar safed
paḌī dhuup aisī ki teyorā ga.e

hamāre gul-andām kā hai ye rañg
zarā dhuup meñ nikle sañvlā ga.e

huā dhuup meñ bhī na kam husn-e-yār
kanhayyā bane vo jo sañvlā ga.e

har moḌ na.ī ik uljhan hai qadmoñ kā sambhalnā mushkil hai
vo saath na deñ phir dhuup to kyā saa.e meñ bhī chalnā mushkil hai

ye ik kamī ki jo ab zindagī sī lagtī hai
hamārī dhuup meñ vo sā.ebān bhī paḌtā

ye dhuup chhāñv ye āb-e-ravāñ ye abr ye phuul
ye āsmāñ ye kabūtar usī se milte haiñ

vaqt ke sahrā meñ nañge paañv Thahre ho 'salīm'
dhuup kī shiddat yakāyak baḌh na jaa.e chal paḌo

khaḌī huuñ dhuup meñ sūraj sambhāle
mirā saaya baḌā phailā huā hai