Tags-Dil

dil ke liye hai ishq to dil ishq kī ḳhātir
mai hai to ye hai aur jo miinā hai to ye hai

raqīb-e-jāñ nazar kā nuur ho jaa.e to kyā kiije
ziyāñ dil ko agar manzūr ho jaa.e to kyā kiije

dil vo tujhe pūchhe yā na pūchhe
par yaad tirī dilāveñge ham

yaañ ummīd-e-qatl hī ne ḳhuuñ kiyā
rah ga.ī hasrat dil-e-jallād meñ

raste meñ dil haar aa.e haiñ
ḳhaak kaheñ rūdād safar kī

laboñ kī bhīgī bhīgī silvaToñ ko muzmahil kar de
numāyāñ rañg-e-peshānī pe aks-e-soz-e-dil kar de

vo sub.h o shaam mirī ruuh meñ haiñ jalva-numā
dil-e-figār o alam-āshnā meñ rahte haiñ

ajiib Dhañg se taqsīm-e-kār kī us ne
so jis ko dil na diyā us ko dilrubā.ī dī

dil kā sarmāya liye tū bhī koī bāzār dekh
tere dushman kā chamak uTThā hai kārobār dekh

dāman-e-dil bhar ke le jaate haiñ arbāb-e-nazar
be-navā darvesh kā darbār hai darbār dekh

har aan haiñ dimāġh meñ afkār-e-shab-navāz
is ġham kī saltanat meñ bas ik dil sirāj hai

ġhalat-fahmiyāñ 'mīt' rakkho na dil meñ
vahī sach nahīñ jitnā tum ne sunā hai

dil ne hushyārī kī kapḌe phaaḌ kar
ḳhil.at-e-dīvāngī pahnā sajan

maiñ bhī sajda kar luuñ 'nāmī' lekin dil ko dhaḌkan hai
kyā ye vahī ka.aba to nahīñ jo kal tak thā but-ḳhāna bhī

ek din kah lījiye jo kuchh hai dil meñ aap ke
ek din sun lījiye jo kuchh hamāre dil meñ hai

kisī kī chaah meñ dil ko jalānā Thiik hai kyā
ḳhud apne aap ko yuuñ āzmānā Thiik hai kyā

bahut sī bātoñ ko dil meñ bhī rakhnā paḌtā hai
har ek baat har ik ko batānā Thiik hai kiyā

jalā hai dil yā koī ghar ye dekhnā logo
havā.eñ phirtī haiñ chāroñ taraf dhuāñ le kar

abhī rusvā.iyoñ kā ik baḌā bāzār aa.egā
phir is ke baad hī vo kūcha-e-dildār aa.egā

karo ahl-e-junūñ kuchh to karo sāmān-e-dildārī
ki shahr-e-ishq meñ vo shoḳh pahlī baar aa.egā