Tags-Dil

koī samjhe naġhma koī samjhe naala
mire sāz-e-dil kī sadā ek hī hai

lamha-e-nau aziim hai
sozish-e-dil hai kyā balā jazb-o-junūñ bhī kuchh nahīñ

dil nahīñ māntā kisī kī bhī
bahs saarī fuzūl kī us ne

chaman chaman hai mohabbat jahāñ jahāñ se jamāl
ye ehtimām hai ik dil kī zindagī ke liye

jab se chaman chhuTā hai ye haal ho gayā hai
dil ġham ko khā rahā hai ġham dil ko khā rahā hai

jo maiñ sar-ba-sajdā huā kabhī to zamīñ se aane lagī sadā
tirā dil to hai sanam-āshnā tujhe kyā milegā namāz meñ

aate aate is taraf un kī savārī rah ga.ī
dil kī dil meñ ārzū-e-jāñ-nisārī rah ga.ī

TukḌe TukḌe ho ke uḌ jā.egā sab sañg-e-mazār
dil meñ ba.ad-az-marg kuchh gar be-qarārī rah ga.ī

ho gayā jis din se apne dil par us ko iḳhtiyār
iḳhtiyār apnā gayā be-iḳhtiyārī rah ga.ī

khīñchte hī teġh adā ke dam huā apnā havā
aah dil meñ ārzū-e-zaḳhm-e-kārī rah ga.ī

sambhāl rakkhī thī maiñ ne huzūr barsoñ se
matā-e-dil thī so yāroñ meñ bāñTtā aayā

dilbaroñ ke raaz kā mahram huā
dard se dil misl-e-jām-e-jam huā

zaḳhm khaa.e ek muddat ho ga.ī
soz-e-dil lekin nahīñ maddham huā

vaqt ne paiham lagā.e dil pe zaḳhm
vaqt ḳhud hī un kā phir marham huā

rahe duniyā meñ mahkūm-e-dil-e-be-mudda.ā ho kar
ḳhushā-anjām uTThe bhī to mahrūm-e-duā ho kar

dil bhī vahī hai maiñ bhī vahī dard bhī vahī
lekin ye kyā ki lazzat-e-soz-e-nihāñ se duur

dil jahāñ le jaa.e dil ke saath jaanā chāhiye
is se baḌh kar aur koī rahnumā hotā nahīñ

ahl-e-dil milte nahīñ ahl-e-nazar milte nahīñ
zulmat-e-daurāñ meñ ḳhurshīd-e-sahr milte nahīñ

us kā ḳhayāl dil meñ ghaḌī do ghaḌī rahe
phir is ke ba.ad mez pe chaa.e paḌī rahe

aisā nahīñ ki ham kareñ bāteñ na be-hisāb
lekin ye kyā ki kiil sī dil meñ gaḌī rahe