Tags-Dil

dil meñ ḳhushī ke phūTte yūñhī raheñ anaar
terī hañsī kī yūñhī sadā phuljaḌī rahe

chalo 'munīr' chaleñ ab yahāñ raheñ bhī to kyā
vo sañg-dil to yahāñ se kahīñ chalā bhī gayā

ka.ī din se ye dil kyuuñ muztarib hai
nahīñ chaltā ab is pe apnā bas kyā

maiñ ne ḳhushbū kī tarah tujh ko kiyā hai mahsūs
dil ne chheḌā hai tirī yaad ko shabnam kī tarah

kaise hamdard ho tum kaisī masīhā.ī hai
dil pe nashtar bhī lagāte ho to marham kī tarah

mirī rūdād-e-dil kī ibtidā tum intihā bhī tum
tumhārā tazkira kaise barā.e-nām likhūñgā

dil kī āvāzoñ kā gumbad ābādī meñ phahTtā hai
duur kisī ḳhāmosh kueñ meñ muñh laTkā kar gaayā kar

dil-nashīñ koī nazāra koī dilkash manzar
baat dilchasp koī ho to ġhazal bantī hai

shā.irī naam hai ehsās ke lau paane kā
aag sī dil meñ dabī ho to ġhazal hotī hai

zindagī aa tirā armān badal kar dekheñ
dil meñ hai jo mire mehmān badal kar dekheñ

aql gul ḳhud ko hai samjhe hue jo ḳhāk-nashīñ
us ke dil kā ye kabhī maan badal kar dekheñ

zehn kī jhiil meñ khil uTThā mohabbat kā kañval
dil meñ jo ġham kā hai tūfān badal kar dekheñ

vo dil-navāz hai lekin nazar-shanās nahīñ
mirā ilaaj mire chāra-gar ke paas nahīñ

batā sharāfat-e-duniyā batā ki khul jaa.e
karegā kab talak is dil meñ ḳhāna-dāmādī

musalsal kahte rahnā dard dil āñkhoñ hī āñkhoñ meñ
zabān ishq meñ 'nātiq' ise taqrīr kahte haiñ

har soch pe ḳhanjar sā guzar jaatā hai dil se
hairāñ huuñ ki sochūñ to kis andāz meñ sochūñ

qadam pichhlā uThā.egā tabhī aage baḌhegā tū
shikasta dil shikasta hausle achchhe nahīñ lagte

āḳhir ġham-e-jānāñ ko ai dil baḌh kar ġham-e-daurāñ honā thā
is qatre ko banñā thā dariyā is mauj ko tūfāñ honā thā

ab khul ke kahūñgā har ġham-e-dil 'majrūh' nahīñ vo vaqt ki jab
ashkoñ meñ sunānā thā mujh ko aahoñ meñ ġhazal-ḳhvāñ honā thā

us ne ye achchhā kiyā jo aqd hī paḌhvā liyā
dil murīdan ke liye jab sūrat-e-sīmāb thā