Tags-Dil

mai-kade kī vahī mānūs fazā aur dil-e-zār
ek bhī raat ba-andāz-e-digar ho na sakī

duā dil se jo nikle kārgar ho
yahāñ dil hī nahīñ dil se duā kyā

sadā maiñ dil kī suntā huuñ to kartā bhī huuñ man-mānī
vo nādāñ huuñ ki phir vaj.h-e-ziyāñ ḳhud ko samajhtā huuñ

maiñ zindagī kī ināyāt se nahīñ mahrūm
qarīb huuñ ġham-e-dil se ġham-e-jahāñ tak maiñ

dimāġh-o-dil meñ halchal ho rahī hai
nadī yādoñ kī be-kal ho rahī hai

sabab-e-dil-shikastagī mat pūchh
sāmne aa.ine ke patthar thā

jis ko 'ābid' sukūn-e-dil kahiye
ab nahīñ hai kabhī mayassar thā

dil-o-nazar ke fusūñ us ko raas aa na sake
vo ā.inoñ se guzarne ko dar banātā hai

shab-e-tanhā.ī bhī hai saath tirī yaad bhī hai
dil kā kyā haal kahūñ shaad bhī nāshād bhī hai

daulat-e-ġham se har ik gosha hai is kā ma.amūr
dil kī duniyā mirī ābād bhī barbād bhī hai

be-sabab to nahīñ ehsās ḳhalish kā mujh ko
bhūlne vaale tire dil meñ mirī yaad bhī hai

hamārā hausla-e-dil agar salāmat hai
badal hī deñge kisī din nizām-e-mai-ḳhāna

vo fāsloñ meñ bhī rakhtā hai rañg qurbat ke
nazar se duur sahī dil ke paas rahtā hai

mirā iḳhlās bhī ik vaj.h-e-dil-āzārī hai
banda-parvar mujhe ehsās-e-gunahgārī hai

dil ke vīrāne ko mahfil kī taraf le chaliye
kyuuñ samundar ko na sāhil kī taraf le chaliye

kaaba o dair ke gumrāhoñ kā anjām hī kyā
yahī behtar hai unheñ dil kī taraf le chaliye

sair-e-mahtāb bahut ḳhuub sahī phir bhī 'niyāz'
dil ko mahtāb-e-shamā.il kī taraf le chaliye

ba-qadr-e-hasrat-e-dil zulm bhī Dhānā nahīñ aatā
vo kyā taskīn deñge jin ko taḌpānā nahīñ aatā

baqā-e-jāvedāñ ke raaz se vāqif nahīñ ai dil
jinheñ rāh-e-vafā meñ ḳhaak ho jaanā nahīñ aatā

ḳhvāhish mar jaa.e to us kī chitā ko aag dikhāne meñ
dhaḌkan dhaḌkan dil ke marghaT jaanā paḌtā hai