Tags-Dil

'muztar' maiñ un ke ishq meñ be-maut mar gayā
ab kyā batā.ūñ jaan ga.ī hai ki dil gayā

dil ke vīrāne ko yuuñ ābād kar lete haiñ ham
kar bhī kyā sakte haiñ tujh ko yaad kar lete haiñ ham

jab buzurgoñ kī duā.eñ ho ga.iiñ be-kār sab
qarz-e-ḳhvāb-āvar se dil ko shaad kar lete haiñ ham

ho gayā aadī 'sachin' dil dard kā
aañkh aadī ho ga.ī barsāt kī

madd-e-nazar nahīñ hai faqat mehrbāñ kī ḳhair
shāmil mirī duā meñ dil-e-dushmanāñ kī ḳhair

TuuTā hai dil jarāhat-e-chāra-garāñ kā shukr
TuuTā hai jaam niyyat-e-shīsha-garāñ kī ḳhair

ġhaflat kī ruī duur na kī shīsha-e-dil suuñ
mai-ḳhāne meñ mastāñ ne sun ilhān buḌhāpā

jitnī mil jā.egī kāñToñ kī chubhan le lūñgā
jo bhī hālat dil-e-be-tāb kī hogī hogī

kisī āñdhī kisī tūfāñ se bujhā.e na bujhā
dil meñ jaltā hī rahā ġham kā diyā ek baras

shauq haiñ kuchh jin ke pīchhe chal rahā huuñ maiñ 'munīr'
rañj haiñ kuchh dil meñ mere khīñchtā jaatā huuñ maiñ

dil sañg nahīñ hai ki sitamgar na bhar aatā
karte na agar zabt to muñh tak jigar aatā

roz tabdīl huā hai mire dil kā mausam
roz kamre meñ mire sard havā aa.ī hai

mere chehre se jo paḌh sakte ho paḌh lo yaaro
dil kī har baat mire lab pe kahāñ aa.ī hai

khulne ko hai qafas kā dar paane ko hai sukūñ nazar
ai dil-e-zār shām-e-ġham ham ko rulā chukī bahut

ishq meñ dard se hai hurmat-e-dil
chashm ko aabrū hai aañsū se

tū bhī rah rah ke mujh ko yaad kare
merā bhī dil tirī panāh meñ hai

hai aks-e-ā.ina dil meñ kisī bilqīs-e-sānī kā
tasavvur hai mirā ustād bahzād aur maanī kā

dil pukārā phañs ke kū-e-yār meñ
rok rakkhā hai mujhe gulzār meñ

fart-e-māyūsī ne murda hasrateñ
dafn kar dī haiñ dil-e-bīmār meñ

ātish-e-ulfat kī dhaḌkan baḌh ga.ī
gir paḌā dil shola-e-ruḳhsār meñ