Tags-Dil

pūchhte ho dhuāñ haiñ kyuuñ āñkheñ
jaañ kī bastī meñ dil jalāyā thā

jalva-gāh-e-dil meñ marte hī añdherā ho gayā
jis meñ the jalve tire vo aa.ina kyā ho gayā

dil khiñchā jitnā qafas meñ āshiyāne kī taraf
duur utnā hī qafas se āshiyānā ho gayā

rafta rafta ho ga.e jazb us meñ jalve saiñkaḌoñ
dil mirā 'sīmāb' tasvīr-e-sarāpā ho gayā

tire ḳhayāl kī tamsīl yuuñ samajh jānāñ
dil o dimāġh meñ bijlī sī ik chamak jaa.e

dard biktā nahīñ bāzār-e-jahāñ meñ varna
jaan tak bech ke letā maiñ tire dil ke liye

har shaam yahāñ shām-e-vīrāñ āseb-zada raste galiyāñ
jis shahr kī dhun meñ nikle the vo shahr dil-e-barbād kahāñ

bāhar bāhar sannāTā hai andar andar shor bahut
dil kī ghanī bastī meñ yaaro aan base haiñ chor bahut

yaad ab us kī aa na sakegī soch ke ye baiThe the ki bas
khul ga.e dil ke saare darīche thā jo havā kā zor bahut

dil se uThā tūfān ye kaisā saare manzar Duub ga.e
varna abhī to is jañgal meñ naach rahe the mor bahut

liyā hai dil hī faqat aur jaan baaqī hai
abhī to kaam tumheñ mehrbān baaqī hai

qabr jaisī nā-pasandīda jagah bhī 'irtizā'
dil kabhī hargiz na chāhegā magar jā.eñge aap

dil kī āvāz laakh maddham hai
dil kī āvāz meñ baḌā dam hai

sañg-e-dar ban kar bhī kyā hasrat mire dil meñ nahīñ
tere qadmoñ meñ huuñ lekin terī mahfil meñ nahīñ

kho chuke ro ro ke ghar bāhar kī saarī kā.enāt
ashk kaise aañkh meñ ab ḳhuun bhī dil meñ nahīñ

pūchhtā hai aarzū 'ahsan' kī tū kyā baar baar
tere milne ke sivā koī havas dil meñ nahīñ

vo jis ke haath se taqrīb-e-dil-numā.ī thī
abhī vo lamha-e-maujūd meñ nahīñ aayā

pahlū meñ mere dil ko na ai dard kar talāsh
muddat huī ġharīb vatan se nikal gayā

pyāsā huuñ is qadar ki mirā dil jo gir paḌā
paanī ubal ke chāh-e-zaqan se nikal gayā

hamāre dil kī udāsī kisī ko kyā ma.alūm
hamīñ samajh na sake kyuuñ hai hichkiyoñ kā jhunD