Tags-Dil

shikast-e-dil hai to kyā rāh-e-ishq tark na kar
ye dekh kyā kahīñ parvarda-e-ziyāñ koī hai

kahīñ pe aaj bhī vo ghar hai hañstā bastā huā
ye vahm sā hai tire dil ko yā gumāñ koī hai

tujhe jyuuñ ġhuncha gar hai dard kī bū
lahū kā ghūñT pī dil-tañg ho jā

kahā kis tarah dil ne tujh kuuñ ai ġham
ki dil kī aarsī par zañg ho jā

ashk par gudāz-dil hāshiya chaḌhātā hai
ik zarā se qisse ko dāstāñ banātā hai

ai 'urūj' ye duniyā qadr-e-dard kyā jaane
kyuuñ zamāna-sāzoñ ko hāl-e-dil sunātā hai

sidq-e-dil se pukārnā mujh ko
lauT ā.ūñgā merā va.ada hai

zarf-e-duniyā jo tañg hai 'taimūr'
terā dil bhī kahāñ kushāda hai

kiyā to hai ishq hazrat-e-dil liyā hai sar par ye bār-e-mushkil
huā agar mudda.ā na hāsil to raaz ifshā na kījiyegā

bayān kī ehtiyāj hai kab rahā hai sirf ek harf-e-matlab
'habīb' kā dard-e-dil sunā sab ab is kā chāra na kījiyegā

'ash.har' kisī ke qurb-e-havasnāk se ġharaz
apnā bhī dil thā bhīñch ke ik baar so ga.e

kunisht-e-dil meñ hai ik josh but-parastī kā
mujhe butoñ kī hai ḳhidmat meñ raam raam se kaam

dard-e-dil meñ yuuñ bhī jab hotī nahīñ koī kamī
kyā zarūrī hai izāfa husn ke andāz meñ

dil-e-hazīñ kī tamannā nigāh ke matlūb
ḳhudā rakhe vo sabhī kuchh haiñ chāragar ke sivā

vo soz-e-dil ki jise log jaan kahte haiñ
nahīñ hai aur koī shai tirī nazar ke sivā

sukūn-e-dil ke liye ham kahāñ kahāñ na ga.e
'sarosh' kuchh na milā zahmat-e-safar ke sivā

maiñ kuchh na kahūñ aur ye chāhūñ ki mirī baat
ḳhushbū kī tarah uḌ ke tire dil meñ utar jaa.e

yuuñ to hone ko sabhī kuchh hai mire dil meñ magar
is dukāñ par aaj tak aayā nahīñ gāhak koī

baaqī hai mere dil meñ abhī azmat-e-vajūd
qatre se kah rahā huuñ ki dariyā se bach ke chal

haa.e ye begānagī apnī nahīñ mujh ko ḳhabar
haa.e ye aalam ki tū dil se judā hotā nahīñ