Tags-Dil

āñkhoñ meñ rahā dil meñ utar kar nahīñ dekhā
kashtī ke musāfir ne samundar nahīñ dekhā

naġhma-hā-e-ġham ko bhī ai dil ġhanīmat jāniye
be-sadā ho jā.egā ye sāz-e-hastī ek din

na nazar se koī guzar sakā na hī dil se malba haTā sakā
na vo dar bachā na vo ghar bachā tere ba.ad koī na aa sakā

mire dil meñ tuḳhm-e-yaqīn rakh de lachak tū shāḳh-e-mizāj ko
vo chaman khilā mire bāġhbāñ jo chaman koī na khilā sakā

na armāñ le ke aayā huuñ na hasrat le ke aayā huuñ
dil-e-betāb meñ terī mohabbat le ke aayā huuñ

laboñ par ḳhāmushī āñkhoñ meñ aañsū dil meñ betābī
maiñ un kī bazm-e-ishrat se qayāmat le ke aayā huuñ

vahī dorāhā vahī kashmakash kidhar jaa.eñ
jahāñ ke saath ki phir dil kī raah par jaa.eñ

kyuuñ āñkhoñ āñkhoñ talak silsila rahe mahdūd
aa ek dūsre ke dil meñ ham utar jaa.eñ

us ke dil-o-nigāh kā kis se kareñ gila
us ke dil-o-nigāh to patthar ke ho ga.e

tarjumān-e-ġham-e-dil kaun hai ashkoñ ke sivā
ik yahī tār-e-shikasta to mire saaz meñ hai

ek le de ke tamannā hai so vo bhī nākām
dil meñ kyā hai jo tirī jalva-gah-e-nāz meñ hai

dil ko dīvāna samajh kar na bahut chheḌo tum
kahīñ kuchh kah na uThe ye haram-e-rāz meñ hai

vo nigāhoñ ko jab badalte haiñ
dil sambhāle nahīñ sambhalte haiñ

jab bhī uThtī hai vo nazar 'iqbāl'
sham.a kī tarah dil pighalte haiñ

āñkhoñ se mire dil meñ samāyā hai jo 'ash.har'
us shoḳh kī sarkār yahāñ bhī hai vahāñ bhī

jiine se bhar chukā hai dil-e-zār kyā karūñ
marne kī ārzū-o-tamannā nahīñ abhī

kaam koī to kabhī vaqt se aage kar jā
ai dil-e-zinda mire marne se pahle mar jā

tamām husn-e-amal hoñ tamām husn-e-bayāñ
ki merā dil bhī tumhī ho mirī zabāñ bhī tumhī

dil-e-mutma.in kī vus.at koī kam hai mā-sivā se
mujhe kaahe kī kamī hai jo talab karūñ ḳhudā se

huī ḳhatm ġham kī āñdhī vahī dil kī lau hai ab bhī
yahī sho.ala thā vo sho.ala ki laḌā kiyā havā se