Tags-Dil

hazrat-e-'bismil' ye achchhī dil ko sūjhī dil-lagī
kar diyā shamshīr-e-qātil kā tamannā.ī mujhe

aa ga.e dil meñ vasvase kitne
vaqt jab e'tibār kā aayā

vo hai dīvāna use gumnāmī o tash.hīr se kyā
ḳhāmushī se kar guzartā hai jo dil meñ Thāntā hai

mere dil ko bhī paḌā rahne do
chiiz rakkhī huī kaam aatī hai

hisār-e-qarya-e-ḳhūñbār se nikalte hue
ye dil malūl thā āzār se nikalte hue

kis dil se karūñ vidā.a tujh ko
TuuTā jo sitāra bujh gayā hai

ābādī bhī dekhī hai vīrāne bhī dekhe haiñ
jo ujḌe aur phir na base dil vo nirālī bastī hai

vahshat-e-dil se phirnā hai apne ḳhudā se phir jaanā
dīvāne ye hosh nahīñ ye to hosh-parastī hai

aañsū the so ḳhushk hue jī hai ki umDā aatā hai
dil pe ghaTā sī chhā.ī hai khultī hai na barastī hai

dil kā ujaḌnā sahl sahī basnā sahl nahīñ zālim
bastī basnā khel nahīñ baste baste bastī hai

'fānī' jis meñ aañsū kyā dil ke lahū kā kaal na thā
haa.e vo aañkh ab paanī kī do būñdoñ ko tarastī hai

ab dil ko hai samjhānā mushkil jo TuuT gayā so TuuT gayā
kyā baat banegī hañsne se hañste haiñ to ronā aatā hai

na.e daaġh khaa.e haiñ kyā aaj dil par
ye gul to hamesha hī khilte rahe haiñ

fardā ko duur hī se hamārā salām hai
dil apnā shaam hī se charāġh-e-sahar huā

tark-e-ta.alluq kar ke zabāñ se dil kā jiinā mushkil hai
ye kaisā āhañg-e-vafā hai tum bhī chup ho ham bhī chup

dil vāloñ kī ḳhāmoshī hī bār-e-samā.at hotī hai
be-āvāzī karb-e-fazā hai tum bhī chup ho ham bhī chup

band TuuTā jo mire dil meñ basī aahoñ kā
phuuT nikle haiñ ka.ī chashme mirī āñkhoñ se

maiñ apne dil ke ujaḌne kī baat kis se kahūñ
koī mizāj pe puurā nahīñ utartā hai

yaqīnan rāz-e-dil maiñ khol dūñgā
diyā apnā jo us ne vāsta to

tujhe mahfūz kar luuñ zehn-o-dil meñ
milā hai tū kahīñ phir kho gayā to