Tags-Dil

maiñ jitnī der tirī yaad meñ udaas rahā
bas utnī der mirā dil bhī mere paas rahā

'bashīr' maiñ use kis tarha be-vafā kah duuñ
nigāh ban ke jo is dil ke aas paas rahā

jahāñ sach baat kahne kā ho matlab jaan se jaanā
usī mahfil meñ bas apnā dil-e-ḳhuddār bolegā

kyā ġham hai agar shikva-e-ġham aam hai pyāre
tū dil ko dukhā terā yahī kaam hai pyāre

ham dil ko lagā kar bhī khaTakte haiñ diloñ meñ
tū dil ko dikhā kar bhī dil-ārām hai pyāre

ai mire dil kī balā achchhā Thahar
sochte haiñ kuchh tirā achchhā Thahar

'anvar' ne badle jaan ke lī jins-e-dard-e-dil
aur is pe naaz ye ki ye saudā girāñ na thā

zamāne ke liye jo haiñ baḌī nāyāb aur mahñgī
hamāre dil se sab kī sab haiñ vo utrī huī chīzeñ

dikhātī haiñ hameñ majbūriyāñ aise bhī dil aksar
uThānī paḌtī haiñ phir se hameñ pheñkī huī chīzeñ

is tarah kar gayā dil ko mire vīrāñ koī
na tamannā koī baaqī hai na armāñ koī

jo dard īsā-nafas na hotā to dil pe kyā e'tibār aatā
kuchh aur paimāñ kuchh aur paikāñ ki zaḳhm jitne the bhar ga.e haiñ

jab ik nigah se ḳharāsh aa.ī zamāne bhar se gila huā hai
jo dil dukhā hai to ranj saare na jaane kis kis ke sar ga.e haiñ

shikast-e-dil tak na baat pahuñchī magar 'adā' kah sako to kahnā
ki ab ke sāvan dhanak se āñchal ke rañg saare utar ga.e haiñ

us ko bhaḌkāo na dāman kī havā.eñ de kar
sho.ala-e-ishq mire dil meñ dabā rahne do

aur ai chashm-e-tarab bāda-e-gulfām abhī
dil hai be-gāna-e-andesha-e-anjām abhī

dil hai majrūh par-o-bāl shikasta hamdam
daam se chhūT ke bhī huuñ maiñ tah-e-dām abhī

ishrat-e-jalva-e-be-bāk mubārak ai ishq
dīda-o-dil haiñ magar tishna-e-paiġhām abhī

ai subuk-sair-e-nazar ek payām-e-rañgīñ
hai harīf-e-ġham-e-dil gardish-e-ayyām abhī

dāvat-e-shauq ba-unvān-e-sitam bhī to nahīñ
us pe ilzām ki hai jazba-e-dil ḳhaam abhī

tū ne kyā chiiz banā dī nigah-e-sehr-tarāz
vo jo thī shīsha-e-dil meñ mai-e-be-nām abhī