Tags-Dil

dikhlā.ī tū ne yaar kī shakl
ai jazba-e-dil tirā bhalā ho

hai dhuup kabhī saaya sho.ala hai kabhī shabnam
lagtā hai mujhe tum sā dil kā to har ik mausam

kabhī to apne faqīroñ kī dil-kushā.ī kar
ka.ī ḳhazāne haiñ tujh par nisār karne ko

kashish kare hai vo mahtāb dil ko zoroñ kī
chalā ye qatra bhī qulzum nisār karne ko

to phir ye dil hī na le aa.uuñ ḳhuub chamkā kar
tire jamāl kā ā.īna-dār karne ko

bahut sā kaam diyā hai mujhe un āñkhoñ ne
havāla-e-dil-e-nā-kardā-kār karne ko

iḳhlās se aarī hai ab pursish-e-ġham ai dil
ye rasm hī duniyā se uTh jaa.e to achchhā hai

dhuup meñ mere saath chalte haiñ
un kī palkoñ ke dil-nashīñ saa.e

roz jaatā huuñ mai-kade kī taraf
kaash ye dil kabhī bahal jaa.e

ye garm garm se aañsū batā rahe haiñ yahī
zarūr aag kahīñ dil ke ās-pās lagī

kyā rashk hai ki ek kā hai ek mudda.ī
tum dil meñ ho to dard hamāre jigar meñ hai

donoñ ne dard-e-ishq ko taqsīm kar liyā
thoḌā sā dil meñ hai to zarā sā jigar meñ hai

maiñ bhī huuñ aaj maiñ ki bar aa.ī murād-e-dil
dil bhī hai aaj dil ki vo mehmān ghar meñ hai

dilbar ho ek tum ki hamārī nazar meñ ho
dil hai hamārā dil ki tumhārī nazar meñ hai

kahte haiñ jis ko dil mire pahlū meñ ab kahāñ
hai bhī to pā.emāl kisī rahguzar meñ hai

jo ḳhaak sī dil meñ uḌ rahī hai
yaañ koī ġhazāl ho na ho thā

kahīñ baiThne de dil ab mujhe jo havās Tuk maiñ bajā karūñ
nahīñ taab mujh meñ ki jab talak tū phire to maiñ bhī phirā karūñ

savāl aaj bhī ye lā-javāb hai 'aslam'
huā hai dil mirā ḳhāna-ḳharāb kis ke liye

muskān laboñ par āñkhoñ meñ tāroñ kā sajānā mushkil hai
dil toḌnā hai āsāñ lekin rote ko hañsānā mushkil hai

hai kāñch sifat dil siine meñ jab TūTtā hai phir juḌtā nahīñ
jis chiiz se dil uTh jaatā hai phir us se lagānā mushkil hai