Tags-Dil

pur-kaif bahāroñ ne bhī dil toḌ diyā hai
haañ un ke nazāroñ ne bhī dil toḌ diyā hai

tūfān kā sheva to hai kashtī ko Dubonā
ḳhāmosh kināroñ ne bhī dil toḌ diyā hai

is Dūbte sūraj se to ummīd hī kyā thī
hañs hañs ke sitāroñ ne bhī dil toḌ diyā hai

kis tarah kareñ tujh se gila tere sitam kā
mad.hosh ishāroñ ne bhī dil toḌ diyā hai

maanā ki thī ġhamgīn kalī ḳhauf-e-ḳhizāñ se
chup rah ke bahāroñ ne bhī dil toḌ diyā hai

aġhyār kā shikva nahīñ is ahd-e-havas meñ
ik umr ke yāroñ ne bhī dil toḌ diyā hai

ye daur-e-mohabbat bhī ajab daur hai is meñ
ai 'naqsh' sahāroñ ne bhī dil toḌ diyā hai

hai naam dil-e-muztar jis kā kahte haiñ jise sab jān-e-hazīñ
marne ke liye miTne ke liye tayyār huī tayyār huā

DhūñDo kisī hasīn ḳharābe meñ zindagī
ye dil to sādhūoñ kā baserā dikhā.ī de

jab siiñ tire mulā.em gāloñ meñ dil dhañsā hai
narmī suuñ dil huā hai tab suuñ ruī kā gaalā

dil-e-vīrāñ ko dekhte kyā ho
ye vahī aarzū kī bastī hai

tirī āñkhoñ se dil kī vādiyoñ tak
koī bhī rāh-rau pahuñchā nahīñ hai

ḳhuub is dil pe tirī aañkh ne Dore Daale
ḳhuub kājal ne tirī aañkh meñ Dorā khīñchā

kuchh roz se udaas hai dil aur bahut udaas
aur kyuuñ udaas hai ye batā hī nahīñ rahā

jo ro.eñ dard-e-dil se tilmilā kar
to vo hañstā hai kyā kyā khilkhilā kar

gayā vo dil bhī pahlū se ki jis ko
kabhī rote the chhātī se lagā kar

dimāġh-o-dīda-o-dil bar-sar-e-paikār hote haiñ
mohabbat kī kahānī meñ ka.ī kirdār hote haiñ

mirī chāhatoñ meñ ġhurūr ho dil-e-nā-tavāñ meñ surūr ho
tumheñ ab ke khānā hai vo qasam ki fareb meñ bhī yaqīn ho

phir dhaḌakne lagā hai dil apnā
kyā kahūñ kyā ḳhayāl meñ guzrā

nigah-e-dost kā bhī mausam-e-lutf
dil hī kī dekh-bhāl meñ guzrā