Tags-Dil

ek arse se ġham-e-hijr meñ masrūf hai tū
aa mire dil meñ tujhe kaam nayā detā huuñ

maiñ sañg-dil huuñ to ik roz ḳhāna-e-dil meñ
lage hue haiñ jo patthar ukhāḌ kar le jā

dil ko dār-us-surūr kahte haiñ
jalva-gāh-e-huzūr kahte haiñ

na kaheñ bā-vafā mujhe muñh se
haañ vo dil meñ zarūr kahte haiñ

dil hai patthar sā un kā bhārī hai
varna haiñ kaan ke bahut halke

barsegī aaj dil kī zamīñ par ye TuuT kar
goyā 'zamān' ġham kī ghaTā mere saath hai

dil jaisā an-mol ratan to jab bhī gayā be-rām gayā
jaan kī qīmat kyā māñgeñ ye chiiz to ḳhair ab sastī hai

dil kī khetī suukh rahī hai kaisī ye barsāt huī
ḳhvāboñ ke bādal aate haiñ lekin aag barastī hai

kyuuñ sabr-āshnā na huā nā-murād dil
tere karam ke haath to yuuñ be-atā na the

thā darbār-e-kalāñ bhī us kā naubat-ḳhāna us kā thā
thī mere dil kī jo raanī amrohe kī raanī thī

is ko ummīd nahīñ hai kabhī phir basne ke
aur vīrānoñ se is dil kā hai vīrāna judā

shikāyat aarzū kī be kiye nāseh nahīñ bantī
ye sab dil-jūiyāñ zāhir kī thī bātin kī khoTī thī

na kyuuñ kar terī yaktā.ī kā kalima naqsh ho dil par
sabaq kī tarah barsoñ ye ibārat ham ne ghoTī thī

dard ko aañkh banāyā hai to phir jā ke kahīñ
dil pe likkhī huī tahrīr nazar nazar aa.ī hai

kisī tasvīr meñ rañgoñ se ubhāre na ga.e
tere chehre ke dil-āvez gulābī haale

dilkash dikhā.ī dete haiñ jo log sub.h-dam
un par nazar na Dāloge tum shaam hone tak

na ab vo yādoñ kā chaḌhtā dariyā na fursatoñ kī udaas barkhā
yūñhī zarā sī kasak hai dil meñ jo zaḳhm gahrā thā bhar gayā vo

phir is ke baad vo aañsū utar gayā dil meñ
zarā sī der ko āñkhoñ meñ ik sharāra huā

dil ko sharār-e-shola-e-ġham ne jalā diyā
pahlū se aa rahī hai jo ḳhushbū kabāb kī

afsāna-e-guzishta ye kahtā hai mujh se dil
kyā zikr un kā bhūliye bāteñ haiñ ḳhvāb kī