Tags-Dil

husn se dil to lagā ishq kā bīmār to ho
phir ye unnāb-e-lab o seb-e-zaqan hai kis kā

kyuuñ na be-sāḳhta bande hoñ dil-o-jāñ se nisār
qudrat allāh kī be-sāḳhta-pan hai kis kā

phir vahī lambī do-pahreñ-surma.ī haiñ phir vahī dil kī hālat hai
bāhar kitnā sannāTā hai andar kitnī vahshat hai

chañg o nai rañg pe the apne lahū ke dam se
dil ne lai badlī to maddham huā har saaz kā rañg

naġhme chup haiñ aur rut bhī kah rahī hai chup raho
kis ko ab dil kī ye nā-āsūdgī taḌpā.egī

kuchh na kuchh 'manzūr' dil se rābta rah jā.egā
us ko mujh se dostī yā dushmanī taḌpā.egī

talqīn-e-sabr dil se to koī dushmanī na thī
dekhā ye haal qābil-e-sharh-o-bayāñ na thā

mere dil-e-ġhuyūr kā husn-e-talab to dekh
goyā zabāñ pe harf-e-tamannā girāñ na thā

'fānī' fusūn-e-maut kī tāsīr dekhnā
Thahrā vo dil ki jis pe sukūñ kā gumāñ na thā

jal uThā dil meñ charāġh-e-āgahī
raah kuchh raushan huī ab ghar chaleñ

us jāñ-navāz kūche meñ ham bhī rahe magar
be-dil kabhī rahe kabhī be-jān se rahe

ye to haiñ chand hī jalve jo chhalak aa.e haiñ
rañg haiñ aur mire dil ke gulistāñ meñ abhī

kis tavaqqo.a pe sharīk-e-ġham-e-yārāñ hoñge
yaad ham kis ko bhalā ai dil-e-nādāñ hoñge

dard kā silsila hai jahāñ tak
dil kī jāgīr hogī vahāñ tak

jahāñ ke ā.īnoñ se dil kā ā.īna hai judā
is ā.īne meñ ham ā.īna-gar ko dekhte haiñ

jis baaj thī dil kuuñ be-qarārī
vo dil kā mire qarār aayā

mujh parda-e-dil pe saaz kar ġham
ho naala merā sitār aayā

jo mire dil meñ aah ho ke rahī
vo nazar be-panāh ho ke rahī

maiñ huuñ aur tohmat-e-zabūnī-e-dil
be-gunāhī gunāh ho ke rahī

ḳhalish-e-dil pe kuchh bharosā thā
vo bhī terī nigāh ho ke rahī