Tags-Dil

kab ye dil o dimāġh hai minnat-e-sham.a khīñchiye
ḳhāna-e-dil-jaloñ ke biich dāġh-e-jigar charāġh hai

dil bhī terā sā chāhiye hai 'nizām'
ishq ke iḳhtiyār karne ko

jab se lazzat-kash-e-jafā hai dil
hājat-e-chashm-e-iltifāt ga.ī

baḌh gayā aur rañg-e-istiġhnā
dard-e-dil kah ke apnī baat ga.ī

lab-e-naushīn-e-yār kī ḳhātir
dil se shīrīni-e-hayāt ga.ī

merā bhī zikr thā tire dil kī kitāb meñ
qirtās par nahīñ huuñ magar hāshiye meñ huuñ

vo sañg-dil añgusht-ba-dandāñ nazar aave
aisā koī sadma mirī jaañ par nahīñ hotā

vo dil diyā nasīb ne jis meñ ḳhushī nahīñ
ik chiiz to milī hai magar kaam kī nahīñ

duniyā kī zīnatoñ meñ nahīñ koī bhī kamī
lekin mirī nazar meñ vo dil-bastagī nahīñ

armān bhī vahīñ haiñ tamannā bhī hai vahī
jis dil se thī ye garmī-e-mahfil vahī nahīñ

va.ade ne tere saare irāde badal diye
hālāñki dard-e-dil meñ zarā bhī kamī nahīñ

maiñ jo sar-ba-sajdā huā kabhī to zamīñ se aane lagī sadā
tirā dil to hai sanam-āshnā tujhe kyā milegā namāz meñ

ab aur is ke sivā na hogī qafas meñ taskīn-e-dil kī sūrat
chaman kī jānib nazar uThā kar kabhī kabhī hañs liyā kareñge

nigāh kī bandisheñ salāmat junūñ kī pābandiyāñ musallam
kahīñ bharam khul gayā to ai dil maiñ kyā karūñgā vo kyā kareñge

hāl-e-dil phuul se chehroñ ko sunāne ke liye
maiñ lab-e-zamzama-parvāz kahāñ se lā.ūñ

abrū-e-yār dil kā ḳhanjar hai
mizha-e-yār nok-e-nashtar hai

ḳhāna-e-dil hai ġhair se ḳhālī
shauq se aao aapkā ghar hai

ḳhuub dil khol kar jafā kar lo
banda muddat se is kā ḳhūgar hai

tham ga.e ashk bhī barse hue bādal kī tarah
dil kī betābī vahī aaj bhī hai kal kī tarah

kisī ummīd kā maskan na tamannā kā mahal
dil kī vīrānī hai sunsān se jañgal kī tarah