Tags-Dil

ka.aba-e-dil tujhe mahfūz agar rakhnā hai
jā ke ulfat kī abābīl se bāteñ kar le

khaḌe ho bārishoñ kī aas meñ kyā kisht-e-dil vaalo
koī baiThā huā hai bādaloñ meñ bijliyāñ bhar kar

yahāñ to harf kā hoñToñ pe aate dam nikaltā hai
dil-e-dīvāna dāman meñ chalā hai arziyāñ bhar kar

kisī ne jab dil-e-barbād kā ahvāl pūchhā hai
bagūle rahguzar kī ḳhaak laa.e muTThiyāñ bhar kar

kahūñ kyā garm-joshī mai-kashī meñ sho.ala-rūyāñ kī
ki sham-e-ḳhāna-e-dil ātish-e-mai se farozāñ kī

junūñ tohmat-kash-e-taskīñ na ho gar shādmānī kī
namak-pāsh-e-ḳharāsh-e-dil hai lazzat zindagānī kī

ye kis ke dil kī aag se jalte haiñ bām-o-dar
sho.ale se uTh rahe haiñ badan ke makān se

ḳhulūs-o-mehr ke paanī ne ThanDā kar diyā āḳhir
jo tum ne aag nafrat kī dil-e-muztar pe rakkhī thī

dil pe haiñ naqsh vo terī bāteñ
jab zabāñ guñg huī tan bole

bante bante Dhah jaatī hai dil kī har tāmīr
ḳhvāhish ke bahrūp meñ shāyad qismat rahtī hai

dhyān meñ mela sā lagtā hai biitī yādoñ kā
aksar us ke ġham se dil kī sohbat rahtī hai

nāla-e-dil kamāl kā niklā
un se pahlū visāl kā niklā

dil kī chorī kī faal kholī thī
naam us mah-jamāl kā niklā

dil liyā terā ai 'nasīm' us ne
gāhak achchhe hī maal kā niklā

hai kahe dete haiñ zahmat-ḳhurda hai
dil to hāzir hai magar pazhmurda hai

jis tarah jī chāhe rakheñ merā dil
jānte haiñ vo ki maal murda hai

na koī uljhan na dil pareshāñ na koī dard-e-nihāñ thā pahle
hamāre hāthoñ meñ titliyāñ thiiñ ye dil bahut shādmāñ thā pahle

na buġhz dil meñ rahe na nafrat bas ek duuje se ho mohabbat
ham aao ta.amīr phir se kar leñ vahī jo hindostāñ thā pahle

dil-e-āvāra kahīñ chashm kahīñ ḳhvāb kahīñ
kaisā bikhrā dar-e-āfāq pe asbāb mirā

dil kahāñ aur kahāñ shorish-e-paiham dil kī
kis tamannā meñ ravāñ hai tan-e-betāb mirā