Tags-Dil

aap is darja afsurda-ḳhātir hoñ aap koī asar apne dil par na leñ
maiñ ne jo kuchh kahā ik fasāna kahā aur fasāne kī koī haqīqat nahīñ

ye aag kaisī dil-e-hazīñ meñ lagī huī hai
ye āñsuoñ kā hai jānib-e-dil bahāv kaisā

ḳhafaqān-e-ġham-e-furqat se dil aisā ulTā
muñh ke bāhar nikal aayā jo kaleja ulTā

naaz o andāz ne dīvāna banāyā dil ko
us parī ne jo dam-e-raqs dupaTTā ulTā

vo ek yaad jo dil se miTī nahīñ ab tak
vo ek naam jo hoñToñ pe aa nahīñ saktā

haa.e phir terī bātoñ meñ dil aa gayā
phir fusūñ-sāz terī nazar ho ga.ī

agarche isrār-e-be-ḳhudī hai tujhe bhī zar-posh mahfiloñ meñ
mujhe bhī zid hai ki tere dil meñ nuqūsh-e-māzī ubhār aa.uuñ

daraḳht-e-dil pe huī thī kabhī vo bārish-e-lams
ye shāḳh-e-zaḳhm har ik pal mahaktī rahtī hai

dil ko dard-āshnā kiyā tū ne
dard-e-dil ko davā kiyā tū ne

thī mohabbat meñ nañg minnat-e-ġhair
jazb-e-dil ko rasā kiyā tū ne

ishq ko tāb-e-intizār na thī
ġhurfa ik dil meñ vā kiyā tū ne

sukūt-e-dil to jazīra hai barf kā lekin
tirā ḳhulūs hai sūraj ke sā.ebāñ kī tarah

maanā ki ye sunsān ghaḌī saḳht gaḌī hai
lekin mire dil ye to faqat ik hī ghaḌī hai

zar-parastoñ se rāh-o-rasm ho par
zehn-o-dil ko ġhulām mat karnā

dard dab jaa.e kisī taur na aañsū aa.e
jazba-e-dil pe batā kis tarah qaabū aa.e

dil ke sahrā meñ bahut tej kulāñche bharte
shaam hote hī tirī yādoñ ke aahū aa.e

kuchh to ho aisā mire dost ki ye raat kaTe
chain bīmār ke dil ko kisī pahlū aa.e

jale haiñ dil na charāġhoñ ne raushnī kī hai
vo shab-parastoñ ne mahfil meñ tīrgī kī hai

ye gustāḳhī ye chheḌ achchhī nahīñ hai ai dil-e-nādāñ
abhī phir ruuTh jā.eñge abhī to man ke baiThe haiñ

āñkhoñ kī bāt-chīt meñ paḌnā ye soch kar
nazroñ ke len-den meñ dil kā ziyān hai