Tags-Diwangi

aql-e-kul ban kar to duniyā kī haqīqat dekh lī
dil ye kahtā hai ki ab dīvāngī ban jā.iye

nazīr ban chuke haiñ rāh-e-ishq kī 'daḳhlan'
ye koī piir haiñ dīvāngī se nikle haiñ

aisī koī āsān hai dīvāngī yaaro
aa.ī bhī to aa.egī qarīnoñ se nikal kar

ain dānā.ī hai 'nāsiḳh' ishq meñ dīvāngī
aap saudā.ī haiñ jo kahte haiñ saudā.ī mujhe

mirī dīvāngī par hañsne vaalo
yahāñ farzāngī dīvāna-pan hai

is tarah to aur bhī dīvāngī baḌh jā.egī
pāgaloñ ko pāgaloñ se duur rahnā chāhiye

mirī dīvāngī ḳhud sāḳhta na.iiñ
maiñ jaisā huuñ maiñ vaisā chāhtā na.iiñ

allāh rakkhe ḳhanda-e-dīvāngī se duur
haiñ āshnā ma.āl-e-ġham-e-mo'atabar se ham

mirī dīvāngī par hañsne vaale
ba-zom-e-ḳhvesh farzāne bane haiñ

ajab dīvāngī hai koī bhī yuuñ dil phañsātā hai
bahut daanā the tum 'mamnūñ' giraftārī kā kyā baa.is

un ko hañsā rahī hai jāma-darī hamārī
parvān chaḌh rahī hai dīvāngī hamārī

ugiiñ vīrāniyāñ kamre meñ chhat meñ dar nikal aa.e
mirī dīvāngī ke phir se bāl-o-par nikal aa.e

merī dīvāngī kā zikr chhiḌā
aaj pahuñchegī jaane baat kahāñ

pattharoñ pe naam likhtā huuñ tirā
dekh tū o but mirī dīvāngī

mirī dīvāngī kyuuñ baḌh rahī hai
bahār aa.ī chaman meñ ham-nafas kyā

vo to duniyā ko mirī dīvāngī ḳhush aa ga.ī
tere hāthoñ meñ vagarna pahlā patthar dekhtā

sukūñ-pasand jo dīvāngī mirī hotī
ḳhabar kisī ko na anjām ishq kī hotī

sahārā luuñ agar dīvāngī kā
guzar jā.ūñ had-e-kaun-o-makāñ se

kamāl-e-dīvāngī to jab hai rahe na ehsās-e-jaib-o-dāman
agar hai ehsās-e-jaib-o-dāman to phir junūñ hoshiyār sā hai

is darja hai musallat dīvāngī kā aalam
dīvāngī bhī mujh ko dīvāna kah rahī hai