Tags-Diwangi

dīvāngī kahāñ ki garebāñ se tañg huuñ
gardan mirī hai tauq meñ goyā ki phañs rahī

huī dīvāngī is darja mash.hūr-e-jahāñ merī
jahāñ do aadmī bhī haiñ chhiḌī hai dāstāñ merī

merī rusvā.iyoñ pe na ḳhush ho merī dīvāngī ko duā do
tum ko jitnī bhī shohrat milegī sirf merī badaulat milegī

vo muztarib hai ki farzāngī ko kuchh na milā
maiñ mutma.in huuñ ki dīvāngī kahīñ pahuñchī

mirī dīvāngī kī had na pūchho tum kahāñ tak hai
zamīñ par huuñ magar merī rasā.ī lā-makāñ tak hai

kaam aa.e na aql-o-hosh jahāñ
ham ne dīvāngī se kaam liyā

tujh ko farzāngī mubārak ho
mujh ko dīvāngī hī kaafī hai

sameT laa.e the jitne bhī ḳhvāb the lekin
huzūr-e-dost bhī dīvāngī ne kuchh na diyā

yahāñ kuchh kam nahīñ dīvāngī se hosh kā da.avā
udhar sīna-sipar huuñ maiñ jidhar se tiir chaltā hai

phir ishq bazm-e-husn kī jānib ravāñ hai aaj
dīvāngī ko aql ke sāñche meñ Dhaal kar

kar ga.ī dīvāngī ham ko barī har jurm se
chāk-dāmānī se apnī chāk-dāmānī huī

ḳhabar-dār ai mirī vahshat ḳhabar-dār
koī laġhzish na ho dīvāngī meñ

kaam aa.ī ishq kī dīvāngī kal raat ko
husn ne baḳhshī matā-e-dostī kal raat ko

dīvāngī ne ḳhuub karishme dikhā.e haiñ
aksar tire baġhair bhī ham muskurā.e haiñ

dīvāngī kī aisī milegī kahāñ misāl
kāñTe ḳhārīdtā huuñ gulāboñ ke shahr meñ

āñkheñ chamak uThī haiñ jo raushan ḳhayāl se
dīvāngī ke ḳhvāb se aage chale ga.e

dīvāngī meñ merī nahīñ hai kisī kā haath
saarā qusūr us meñ mirī ādatoñ kā hai

tishnagī baaqī rahe dīvāngī baaqī rahe
ranj-o-ġham hai is liye tā-ki ḳhushī baaqī rahe

dīn-o-duniyā se jaanā paḌtā hai
dil ko dīvāngī banāne meñ

bazm-e-bahār-e-kunj-e-haram sehn-e-mai-kada
dīvāngī ne hashr uThā.e kahāñ kahāñ