Tags-Dost

le jaatī hai us samt hameñ gardish-e-daurāñ
ai dost ḳharābāt se kyā kaam hamārā

har āshnā meñ kahāñ ḳhū-e-mehrmāna vo
ki bevafā thā magar dost thā purānā vo

yahī hisāb hai apnī bhī zindagī kā dost
naqd meñ din kā kiyā saudā aur udhārī raat

sāmrāj ke dost hamāre dushman haiñ
inhī se aañsū aa.heñ āñgan āñgan haiñ

ilāhī mire dost hoñ ḳhairiyat se
ye kyuuñ ghar meñ patthar nahīñ aa rahe haiñ

ik zarā vaqt mayassar ho to aa kar mire dost
dil meñ khilte hue phūloñ ko nasīhat kar jaa.eñ

koī bhī ishq meñ utnī hī der tikTā hai
ki jaise sāmne soī ke kuchh ġhubāre dost

maiñ shahrī ho ke kabūtar uḌā rahā huuñ kyuuñ
vo be-samajh hai samajhtī nahīñ ishāre dost

ye āshiqī hai jo kartī hai dil ko dariyā bhī
phir is ke ba.ad dikhā.egī do kināre dost

maiñ is ko phone karūñ aur vo kahe jī kaun
ye dil kī zid hai ki faurī kahūñ tumhāre dost

ab apnī umr se bāteñ baḌī nahīñ karnī
mujhe buzurg samajhne lage haiñ saare dost

dostī ke rishte par jab savāl uThtā hai
dost ko mukarne meñ der kitnī lagtī hai

kabhī kabhī to tirī dostī meñ ham ai dost
ḳhud apne ālam-e-āvārgī se ghabrā.e

tujh se judā ho kar to maiñ mar jā.ūñgā
mujh ko apnā sar ai dost nishānī de

subūt miltā hai us se kisī ta.alluq kā
kamāl-e-barhamī-e-dost dushmanī to nahīñ

ai dost sukūñ ham ko mayassar nahīñ hotā
āshuftagī-e-dahr se ghabrā.e hue haiñ

haath se bachchoñ ke nikle merī jholī meñ gire
ban ga.e haiñ dost ye bachchoñ ke patthar aur maiñ

dard ke itaab le dost use shumār kar
ḳhuun kā hisāb de zaḳhm iḳhtiyār kar

ārām ke the sāthī kyā kyā jab vaqt paḌā to koī nahīñ
sab dost haiñ apne matlab ke duniyā meñ kisī kā koī nahīñ

ai nigāh-e-dost ai sarmāya-dār-e-be-ḳhudī
hosh aatā hai to hotī hai pareshānī mujhe