Tags-Dost

maiñ yuuñ to ek mohabbat ke qā.elīn meñ thā
tujhe milā to rahā hī nahīñ gayā mire dost

bichhaḌte vaqt zarūrat nahīñ hoī mahsūs
aur ab na rābta number na rābta mire dost

havā ho garm ki ThanDī pasīna sūkhtā hai
vo merā dost hai achchhā hai yā burā mire dost

tumhāre ghar pe maiñ aa to nahīñ rahā mire dost
ghumā phirā ke batāo na rāsta mire dost

purāne giit meñ shāmil kiye haiñ saaz na.e
suḳhan meñ itnā to hissa rahā mirā mire dost

kyuuñ kibr-o-ġhurūr is daur pe hai kyuuñ dost falak ko samjhā hai
gardish se ye apnī baaz aayā yā rañg badalnā chhoḌ diyā

dushman koī ai yaar mirā aur tirā dost
hogā na zamāne meñ mire dil ke barābar

vo aadmī kahāñ hai vo insān hai kahāñ
jo dost kā ho dost adū kā adū na ho

dil-e-tabāh bhī hai ālam-e-ḳharāb bhī hai
nigāh-e-dost yahī vaqt-e-inqalāb bhī hai

na sahī pasand-e-hikmat ye shi.ār-e-ahl-e-dil hai
kabhī sar bhī de diyā hai ba-salāh-e-dost-dārāñ

havā le aa.ī thī is shahr meñ ai dost varna
abhī pesh-e-nazar naql-e-makānī bhī kahāñ thī

aisī manzil pe aa gayā huuñ dost
tire ġham kā faqat sahārā hai

phir paanī meñ Daal madhānī baiTh ga.e haiñ dost
phir merī roTī par chupḌeñge ye phīke jhaag

jo sab kā dost thā har anjuman kī raunaq thā
kal us kī laash milī us ke ghar ke malbe par

rafīq dost muhib mujh ko shaaq sab hī the
agarche kahne ko ye ham-mazāq sab hī the

kaisā is ahd meñ paimān-e-vafā log ab to
dost har saal badalte haiñ calender kī tarah

dil meñ mire jigar meñ mire aañkh meñ mirī
har jā hai dost aur nahīñ miltī hai jā-e-dost

siine meñ dāġh-hā-e-mohabbat kī hai bahār
phūlā hai ḳhuub ye chaman dil-kushā-e-dost

kaisī vafā sitam se bhī us ne uThā.e haath
rah rah ke yaad ab aatī hai tarz-e-jafā-e-dost

āñkhoñ ko sūjhtā hī nahīñ kuchh sivā-e-dost
kānoñ meñ aa rahī hai barābar sadā-e-dost