Tags-Dost

siine meñ dāġh-hā-e-mohabbat kī hai bahār
phūlā hai ḳhuub ye chaman dil-kushā-e-dost

yahāñ bhī dost mil jaate haiñ 'alvī'
yahāñ bhī dostoñ meñ talḳhiyāñ haiñ

maiñ sañg-e-sāda huuñ lekin mirī ye hasrat hai
makān dost ke dīvār-o-dar meñ rakkhā jaa.e

shab-e-visāl kā ahvāl pūchhnā mat dost
pas-e-qabā-e-ġhazab itr-ambarīñ thī aag

kyā kyā na dost apne miyān-e-adam ga.e
kis ko talāsh kījiye kis ko pukāriye

dost ahbāb se lene na sahāre jaanā
dil jo ghabrā.e samundar ke kināre jaanā

shab faroġh-e-bazm kā baa.is huā thā husn-e-dost
sham.a kā jalva ġhubār-e-dīda-e-parvāna thā

bazm-e-dost meñ 'shahzād' tum bhī kuchh hañso bolo
chup rahe se hotī hai duur duur rusvā.ī

ai dost pahle qurb kā nashsha ajiib thā
maiñ sun sakā na apne badan kī pukār bhī

ajab is kā kyā na samā.ūñ maiñ jo ḳhayāl-e-dushman-o-dost hai
vo maqām huuñ ki guzar nahīñ vo makān huuñ ki patā nahīñ

rūThe haiñ ham se dost hamāre kahāñ kahāñ
TuuTe haiñ zindagī ke sahāre kahāñ kahāñ

ai dost tirī baat sahar-ḳhez bahut hai
par tarz-e-takallum tirā ḳhūñ-rez bahut hai

ḳhizāñ ke mausam-e-ḳhāmosh ne sadā dī hai
jamāl-e-dost ne phir bhī mujhe pukārā nahīñ

is dil ko ham-kanār kiyā ham ne kyā kiyā
dushman ko dost-dār kiyā ham ne kyā kiyā

ishq-e-sitam samajh ke zarā ai nigāh-e-dost
ye terā imtihāñ hai mirā imtihāñ nahīñ

din raat tumhārī yādoñ se ham zaḳhm sañvārā karte haiñ
pardes meñ jaise-taise hī ai dost guzārā karte haiñ

zindagī maut se bad-tar thī par ai va.ada-e-dost
lazzat-e-kashmakash-e-shauq ne marne na diyā

aaj phir hai hameñ ḳhushī ai dost
aa.ī chhabbīs january ai dost

jo bhī haiñ ham bas ik hamīñ haiñ ham
dost kyā kyā gumān rakhte haiñ