Tags-Dost

kyā un kī bhī āñkhoñ meñ hai merā hī gul-e-tar
aise to mere dost gulistāñ nahīñ hote

ai dost aur hai tirā dil aur hī zabāñ
ab tujh ko muñh lagā.eñge ham kam bahut hī kam

tere qāmat se bhī lipTī hai amar-bel koī
merī chāhat ko bhī duniyā kī nazar khā ga.ī dost

kis qadar sābit qadam haiñ rah-ravān-e-dost
jā.eñge phir un kī koī jaan le le jā.eñge

halākat-e-dil-e-nāshād rā.egāñ bhī nahīñ
nigāh-e-dost meñ ab koī imtihāñ bhī nahīñ

maiñ jān-o-dil se tasavvur-e-husn-e-dost kī mastiyoñ ke qurbāñ
jo ik nazar meñ kisī ke be-kaif āñsuoñ ko sharāb kar de

dost kab dost kā hotā hai muḳhill-e-rāhat
so ga.e paañv to hāthoñ se jagāyā na gayā

koī armāñ talāsh-e-dost kā kyuuñ dil meñ rah jaatā
ġhubār apnā agar gard-e-rah-e-manzil meñ rah jaatā

ye sikhāyā hai dostī ne hameñ
dost ban kar kabhī vafā na karo

manzil-e-ishq nahīñ aql ke bas kī ai dost
hai agar sāhib-e-dil qāfila-sālār badal

'mahrūm' kyā kalām bhī apnā fanā huā
kyuuñ ham ko kho ke dost hamāre udaas haiñ

nashsha-e-mai meñ khulī dushmanī-e-dost mujhe
āb-e-añgūr ne kī ātish-e-pinhāñ paidā

dil meñ jo kuchh hai vo kah do dost se varna 'salīm'
harf-e-nā-gufta diloñ kā fāsla ban jā.egā

ḳhush bhī hai iltifāt-e-dost se dil
ġhairat-e-ishq sar-nigūñ bhī hai

dikhā.ī paḌtā hai aadā meñ ek chehra-e-dost
so haath sāhibo saif o sināñ se khīñchte haiñ

baḌh ga.ī hai jo aaj kal mire dost
khīñchī jā.egī vo zabāñ mire ba.ad

apnī is haar ko maiñ jiit na kyuuñ kar samjhūñ
ḳhud ko khoyā hai to ai dost tujhe paayā hai

kāfir-e-ishq na samjhūñ to use kyā samjhūñ
mere iḳhlās ko ik dost ne Thukrāyā hai

ab na.e dost banāne kī to himmat hī nahīñ
dil se nazdīk haiñ jo dost purāne haiñ bahut

na dekho dost ban kar tum to dushman kī nazar dekho
ḳhafā ho kar bigaḌ kar ruuTh kar dekho magar dekho