Tags-Dost

mere paas
koī baaġh nahīñ hai dost

na koī dushman na dost apnā na nek-o-bad se hameñ ta.alluq
jo chashm-e-vahdat se ham ne dekhā na kuchh burā hai na kuchh bhalā hai

vo aadmī jo mirā dost thā zamāne tak
pata nahīñ ki yakāyak badal gayā kaise

dopahar maidān garmī habs abr-e-be-matā
sar-nigūñ hai ḳhār-o-ḳhas par ik gul-e-fīroza-fām

tū bhī maan gayā ai dost ki dariyā sirf Dubotā hai
mere baare meñ duniyā ne tujh ko ḳhām-ḳhayālī dī

in ko tūfānoñ se kyā matlab bhañvar se kyā ġharaz
dost jitne haiñ tamāshā.ī faqat sāhil ke haiñ

ham ne ye nairañgiyāñ bhī dahr kī dekhīñ ki log
dost haiñ maqtūl ke aur ham-navā qātil ke haiñ

niiñd aatī hai yazdānī-e-muztar ko sakūñ se
ye maut hai yā dost ke dāman kī havā hai

mo'taqid is baar shāyad surḳh-rū hone ko hai
dost thā jo ab talak vo bhī adū hone ko hai

tamām shab dil-e-vahshī talāsh kartā hai
har ik sadā meñ tire harf-e-lutf kā āhañg

ik sahīfa nayā utrā hai sunā hai logo
mārnā dost kā bhī jis meñ ravā hai logo

ashkoñ kā mirī aañkh se paiġhām na aa.e
ilzām ye ai dost tere naam na aa.e

shikva hai kufr ahl-e-mohabbat ke vāste
har ik jafā-e-dost pe shukrāna chāhiye

dam-e-zulmat bhī jo āñkhoñ meñ hai tasvīr-e-sahar
haath kuchh is meñ bhī ai dost tumhārā to nahīñ

mujhe dost kahne vaale zarā dostī nibhā de
ye mutālba hai haq kā koī iltijā nahīñ hai

pahlū meñ dil hamāre hai zeb-e-kanār-e-yār
āġhosh meñ hai dost to dushman baġhal meñ hai

bā-vafā.ī kī adā paane lagā huuñ tujh meñ
ai jafā-dost ye kyā dekh rahā huuñ tujh meñ

jaan de dī maiñ ne tañg aa kar vufūr-e-dard se
aaj manshā-e-jafā-e-dost puurā ho gayā

paiham talāsh-e-dost maiñ kartā chalā gayā
kaunain kī hadoñ se guzartā chalā gayā

ḳhanjar raqīb kā thā to tadbīr dost kī
maqtal meñ 'zoyā' yaar kī shirkat ġhazab kī thī