Tags-Dua

phuul ban kar khilo koī ḳhushbū bano kuchh mudāvā karo
kah rahī hai falak nā-rasīda duā shahr vaalo suno

ham ki majnūñ ko duā kahte haiñ
rū-e-lailā ko sabā kahte haiñ

luT chuke vo haath shāhid jin se māñgī thī duā
haañ abhī tak hai fazāoñ meñ mahak tāsīr kī

duā ke Dhañg hī ahbāb ko nahīñ aate
ġhalat hai ye ki duā meñ asar nahīñ aatā

umreñ guzar ga.ī haiñ asar kī talāsh meñ
kis nā-murād lab kī duā ho ga.e haiñ ham

zindagī dasht-e-tilismāt kī jānib hai ravāñ
kuchh to hamrāh buzurgoñ kī duā bhī rakh le

yahāñ se jab ga.ī thī tab asar par ḳhaar khaa.e thī
vahāñ se phuul barsātī huī palTī duā merī

ḳhudā se vaqt-e-duā ham savāl kar baiThe
vo but bhī dil ko zarā ab sambhāl kar baiThe

duniyā mire paḌos meñ ābād hai magar
merī duā-salām nahīñ us zalīl se

aane se tire rañg badal degī tamannā
alfāz badal jā.eñge ai dost duā ke

mujh sā saade bhī koī hogā zamāne meñ ki maiñ
apne qātil ko bhī umroñ kī duā detā huuñ

duniyā meñ aaj mujh ko balāoñ kā Dar nahīñ
har lamha merī maañ kī duā mere saath hai

baabā ye mujh haqīr ko itnī baḌī duā
tū baat kā dhanī hai tirā qad sivā rahe

sahūlateñ to mujhe raas hī nahīñ ātīñ
qubūliyat kī ghaḌī meñ duā musībat hai

haiñ jahāñ tak shajar-e-duniyā sab ho jāveñ taak ke
yā-ilāhī hai duā gar āshiqoñ kī mustajāb

abhī raah meñ ka.ī moḌ haiñ koī aa.egā koī jā.egā
tumheñ jis ne dil se bhulā diyā use bhūlne kī duā karo

jo duā māñgī hai auroñ hī kī ḳhātir māñgī
hausla aaj mire dast-e-duā kā niklā

maiñ tahī-nasīb sahī magar mirī chashm-e-nam ko duā to de
tirī maañg ai shab-e-zindagī sadā motiyoñ se bharī rahī

kisī ko koste kyuuñ ho duā apne liye māñgo
tumhārā fā.eda kyā hai jo dushman kā zarar hogā