Tags-Dua

koī miltā nahīñ ḳhudā kī tarah
phirtā rahtā huuñ maiñ duā kī tarah

sukhī rahe vo sadā apne ghar ke āñgan meñ
is ik duā ke liye haath ab uThā.ūñ maiñ

jamāl-e-sub.h se nā-āshnā huuñ
kisī tārīk shab kī bad-duā huuñ

shab-o-roz lab pe hai ai 'vafā' ye duā ki maut hī de ḳhudā
jo yahī hai mere nasīb meñ ki asīr-e-dām-e-balā rahūñ

adam vajūd meñ bhartī hai ik rag-e-maujūd
ab aur is ke sivā kyā duā meñ rakkhā hai

dard ko 'āzar' duā maiñ kyuuñ na duuñ
dard hī se shā.erī zinda rahī

is dard-e-judā.ī se kahīñ jaan nikal jaa.e
'āzurdā' mire haq meñ zarā yuuñ bhī duā kar

kisī ke lab pe 'nasīm'-e-sahar duā kaisī
yahī hai vird-e-zabāñ kaun maarā jā.egā

lamha-dar-lamha tirī raah takā kartī hai
ek khiḌkī tirī aamad kī duā kartī hai

but ḳhudā ban ke baar baar aa.e
maiñ hī sharminda-e-duā na huā

zarā ishāra huā āsmāñ ke andar se
duā pahuñch bhī ga.ī ḳhāk-dāñ ke andar se

uThte hue dekhā hai dhuāñ ātish-e-gul se
kyā nik.hat-e-barbād jale dil kī duā thī

kyā jāniye marnā bhī ravā hai ki nahīñ hai
takvīn ke lab par mire jiine kī duā thī

vo duā aur hai jo maañg rahe haiñ ki abhī
dil meñ ik aur duā aur sī rakkhī huī hai

salīb-o-dār pe chaḌh kar hue haiñ lā-fānī
ye dast-e-marg bhī dast-e-duā sā lagtā hai

mirī tamām riyāzat kā ek hāsil hai
vahī duā jo tere naam se juḌī huī hai

tujh ko bhūle to duā tak bhūle
aur vahī vaqt-e-duā thā shāyad

na duā de na hī davā de bas
ishq kā ye buḳhār rahne de

vāshud huī na dil ko faqīroñ ke bhī mile
khultī nahīñ girah ye kasū kī duā se aaj

'jamīl' un se ta.āruf to ho gayā lekin
ab un ke baad kisī se duā salām na ho