Tags-Dua

hādse ziist kī tauqīr baḌhā dete haiñ
ai ġham-e-yār tujhe ham to duā dete haiñ

mohabbatoñ kā sila nahīñ hai
laboñ pe harf-e-duā nahīñ hai

na ghabrāo 'monā' pareshāniyoñ se
asar lā.egī har duā rafta rafta

harīf-e-matlab-e-mushkil nahīñ fusūn-e-niyāz
duā qubūl ho yā rab ki umr-e-ḳhizr darāz!

hazar na kījiye milne se ḳhāksāroñ ke
duā to hai jo faqīroñ ke paas maal nahīñ

hazār baar jo māñgā karo to kyā hāsil
duā vahī hai jo dil se kabhī nikaltī hai

na jaane kaun sī manzil pe ishq aa pahuñchā
duā bhī kaam na aa.e koī davā na lage

āñkheñ jo atā kī haiñ to ye bhī duā sun le
dekhūñ to use dekhūñ yā jaañ se guzar jā.ūñ

na to kufr ke na ḳhudā ke ham na davā ke ham na duā ke ham
ki butān-e-ka.aba-e-ārzū dil-e-barhaman se chale ga.e

ik aarzū ki dil meñ rahī hai tamām-umr
tañg aa ke aaj dast-e-duā tak pahuñch ga.ī

maiñ nahīñ jāntā daryūza-garī ko lekin
mere lab par hai duā kyā ye duā jāntī hai

naam hoñToñ pe tirā aa.e to rāhat sī mile
tū tasallī hai dilāsa hai duā hai kyā hai

ai 'sham.a' kis ne dī thī tujhe aisī bad-duā
ghar meñ koī charāġh na jaltā dikhā.ī de

na hausla hai duā kā na aah par hai yaqīñ
ki ham se ruuTh gayā hai hamārā rab kab se

kyā kyā bahāreñ aa.iiñ kyā kyā daraḳht phūle
naḳhl-e-duā ko lekin maiñ bārvar na dekhā

ye baat baat par uThānā haath bad-duā ke vāste
mirā yaqīn kar halāl ko harām kar rahā huuñ maiñ

tumhī ne ham ko sunāyā na apnā dukh varna
duā vo karte ki ham āsmāñ hilā dete

zindagī TūTte shīshoñ kī sadā ho jaise
zindagī kāñpte hoñToñ kī duā ho jaise

vo baḌā rahīm o karīm hai mujhe ye sifat bhī atā kare
tujhe bhūlne kī duā karūñ to mirī duā meñ asar na ho

mire vaqār pe tere karam pe harf aatā
maqām-e-shukr hai merī duā qubūl nahīñ