Tags-Dua

kaam apnā 'harī' parastish hai
be-asar phir rahe duā kab tak

us se mile zamāna huā lekin aaj bhī
dil se duā nikaltī hai ḳhush ho jahāñ bhī ho

maan le ab bhī mirī jān-e-adā dard na chun
kaam aatī nahīñ phir koī duā dard na chun

bahut se rog duā māñgne se jaate haiñ
ye baat ḳhūgar-e-rasm-e-davā se kaun kahe

tanhā.ī mirā pā-e-shikasta
tanhā.ī mirā dast-e-duā thā

abhī diloñ kī tanāboñ meñ saḳhtiyāñ haiñ bahut
abhī hamārī duā meñ asar nahīñ aayā

duā salām na hadd-e-adab na ijz-o-ḳhulūs
ye mere shahr meñ ab kaun aa.e jaate haiñ

dekh be-chārgī-e-kū-e-mohabbat koī dam
saa.e ke vāste dīvār duā kartī hai

duā meñ haath thakte jā rahe the
abhī girte ki yaksar aa ga.e tum

gumbad-e-aflāk par jis kā huā akasr guzar
vo dil-e-bīmār-e-ġham kī ik duā thī maiñ na thā

jis kī har ik iiñT meñ jazb haiñ un ke apne hī aañsū
vaa.e ki ab vo ahl-e-duā hī is mehrāb ko Dhāte haiñ

jo hoñT sil ga.e vo sanā-ḳhvāñ usī ke the
jo mar gayā vo harf-e-duā bhī usī kā thā

koñpleñ phuuT paḌīñ dast-e-duā se mere
dam-e-āmīn jo meñ dīda-e-tar par rakkhā

charāġh bāñTne vāloñ pa hairateñ na karo
ye āftāb haiñ, shab kī duā meñ shaad raheñ

maiñ rab ke nuur se mahv-e-kalām huuñ sar-e-shām
sū-e-charāġh-e-duā tū bhī darmiyāñ se nikal

kaho kāfiroñ se kareñ ḳhushī ki ye mas.ala hai tanāsuḳhī
mire naale ḳhaak meñ jab mile to subū ke dast-e-duā hue

ham ne bhī bahut us ko bhulāne kī duā kī
ham ne bhī bahut dekhā hai ro kar ka.ī din tak

mahīne bhar kā to rasta hai par duā ye hai
ki peshtar vo qamar daura-e-qamar se phire

ye soch kar ki ināyat kiyā huā hai tirā
duā na māñgī kabhī dard meñ kamī ke liye

zamīñ se duur chale aa.e haiñ magar 'bebāk'
duā karo ki yahīñ ḳhatm ye uḌaan na ho