Tags-Dua

tumheñ yaad hai mire sāthiyo ki bichhaḌ ga.e the vahīñ se ham
tumheñ dard-e-dil kī davā milī mujhe dard-e-dil kī duā milī

darvesh haiñ ham āḳhir do-ik nigah kī ruḳhsat
goshe meñ baiThe pyāre tum ko duā kareñge

had ho chakkī hai sharm-e-shakebā.ī ḳhatm ho
behtar hai ab duā kī pazīrā.ī ḳhatm ho

koī saaya to milā dhuup ke zindānī ko
merī vahshat tirī chāhat ko duā detī hai

ham us ke haiñ sarāpā adbadā kar us se kyā māñgeñ
uThāyā hai kabhī ai mudda.ī dast-e-duā ham ne

ḳhudā kī be-ruḳhī par ro rahī hai
duā mujh se lipaT kar ro rahī hai

saaqī tire lutf-e-ām se ham vāqif haiñ magar ye yaad rahe
is daur meñ kam raas aatī hai shīshe ko duā paimāne kī

sun leñ jo vo zahe-nasīb gar na suneñ to kyā gila
hai ye unhīñ se guftugū tark-e-duā kī vaj.h kyā

khulā mire liye bāb-e-asar nahīñ na sahī
mire laboñ pe koī be-asar duā likh do

zindagī dhuup meñ jalte hue kaaTī jis ne
saaya mil jaa.e koī us ko duā dī jaa.e

merī duā yahī hai sharīk-e-safar ke saath
aa jaa.e ham ko husn-e-nizāmat ḳhudā kare

phir us ke baad jo tū chāhe zulm kar duniyā
bas ek harf-e-duā mustajāb mere liye

pur-haul vāqi.āt ke gumbad meñ haiñ asiir
ham kyā kareñ hamārī duā kā 'asar' gayā

sar-bulandī kyuuñ na ho mujh ko atā
apne sar maañ kī duā rakhtā huuñ maiñ

zamīnī baat hai Thahregī āḳhir justujū par
hamesha saath rahne kī duā kaafī nahīñ hai

jahāñ duā miltī thī allāh joḌī salāmat rakkhe
maiñ ne tere ba.ad udhar se guzarnā chhoḌ diyā hai

tā chand past fitrati-e-tab-e-ārzū
yā rab mile bulandī-e-dast-e-duā mujhe

ḳhudī na ho sakī minnat-kash-e-nashāt-e-vafā
hamārā haath kabhī mā.il-e-duā na rahā

lab pe aatī hai duā ban ke ye chāhat merī
zindagī qaab ke chamchoñ kī ho sūrat merī

vo haath jin se thā kal chaak dāman-e-aflāk
vo haath aaj uThāne paḌe duā ke liye