Tags-Duniya

mizāj-e-ishq ho mānūs-e-zindagī itnā
ki misl-e-ḳhalvat-e-mahbūb ho bharī duniyā

is rañg badaltī duniyā meñ pahchān baḌī hī mushkil hai
ye kis ko ḳhabar hai ai 'shāhid' kis bhes meñ kaun luTerā hai

duniyā kā ḳhauf thā to lagāte na aag hī
yā mom kā pighaltā huā ghar bhī dekhte

naqsh-e-vafā meñ rañg vahī hai dekho to
jis kī duniyā jo duniyā kā dushman hai

tark duniyā karūñgī jab maiñ bhī
sāmne mere jām-e-vahdat ho

kaise karegā sāmnā duniyā kā ab kamāl
zillat kī gahrī khaa.ī meñ pheñkā gayā vajūd

kyā karūñ ai kār-e-duniyā kyā karūñ
vo mujhe hai phir se yaad aayā huā

DhūñDhne se yuuñ to is duniyā meñ kyā miltā nahīñ
sach agar pūchho to sachchā āshnā miltā nahīñ

is duniyā meñ be-qadroñ se kis ne paayā faiz
us ke pyaar meñ jiinā marnā sab bekār gayā

chaḌhte sūraj kī parastish go thā duniyā kā usuul
ham kisī ko pūjte kaise ki 'ḳhāvar' ham bhī the

aa zarā dekh leñ duniyā ko bhī kis haal meñ hai
ka.ī din ho ga.e dushman kī ziyārat nahīñ kī

duniyā kī zīnatoñ meñ nahīñ koī bhī kamī
lekin mirī nazar meñ vo dil-bastagī nahīñ

kaun huuñ kyuuñ zinda huuñ sochtā rahtā huuñ
ḳhvāboñ kī duniyā meñ jāgtā rahtā huuñ

mere jiine na jiine meñ kyā farq hai merā jiinā na jiinā barābar hai ab
mujh ko marne hī do mujh ko marne hī do mere marne se duniyā na mar jā.egī

merī duniyā mirī zindagī tak hī hai aur ik din merī maut ke saath hī
ḳhātma merī duniyā kā ho jā.egā merī duniyā mire saath mar jā.egī

Darne vāloñ ko duniyā Darātī rahī Darne vāloñ ko duniyā Darātī rahe
tum Daroge na duniyā se lekin agar haar kar tum se duniyā hī Dar jā.egī

duniyā kī nafrateñ mujhe qallāsh kar ga.iiñ
ik pyaar kī nazar mire kaase meñ Dāliye

pas-e-tasvīr ho jab ek rañg-e-ātish-o-āhan
tirī tasvīr ai duniyā zarā achchhī nahīñ lagtī

jis ko duniyā ne bhī bekār samajh rakkhā thā
maiñ ne sīkhā hai bahut kuchh isī bekār ke saath

to rāh-e-rāst apne karam se dikhā mujhe
raste ġhalat hazār haiñ duniyā meñ ai ḳhudā