Tags-Duniya

tirī nazar ko nazar lag na jaa.e duniyā kī
bhare jahāñ meñ jo merā hī intiḳhāb kiyā

patthar jaisī duniyā hai ḳhud-ġharzī hai
us ko kyuuñ kar dard sunāne lagte haiñ

badaltā hai har daur ke saath saaqī
ye duniyā hai kitnī baḌī inqilābī

'nazīr' apnī duniyā to ab tak yahī hai
sharāb āftābī fazā māhtābī

na tum mile the to duniyā charāġh-pā bhī na thī
ye mehrbāñ to nahīñ thī magar ḳhafā bhī na thī

badal rahā hai musalsal mizāj duniyā kā
ye bevafā thī magar aisī be-hayā bhī na thī

vaqtoñ ke siyāh rañg se zarroñ pe likhā hai
duniyā meñ koī daur sharāfat kā nahīñ thā

ab riit yahī hai duniyā kī tum bhī na bano begāna kahīñ
ilzām nahīñ dhartā tum par ik jī kā dhḌaknā kahtā huuñ

guzre jis dam ham duniyā se
ham ne jaanā duniyā guzrī

dūsrā tujh sā koī na dekhā
pesh-e-nazar ik duniyā guzrī

rasm-e-duniyā ke salāsil meñ giraftārī hai
mat Thaharnā ki kahīñ phāñs javāñ-tar ho jaa.e

dil meñ soz-e-ġham kī ik duniyā liye jaatā huuñ maiñ
aah tere mai-kade se be-piye jaatā huuñ maiñ

bikhrī haiñ rāstoñ pe safar kī kahāniyāñ
duniyā nuqūsh-e-pā ke sivā aur kuchh nahīñ

vo jin kā ilm kī duniyā meñ bol baalā hai
jahān-e-ilm meñ phailā huā ujālā hai

is qadar sachchā.ī se bezār duniyā ho ga.ī
zad pe gardan hai mirī, talvār duniyā ho ga.ī

us ke dil meñ niim golī, shahd bātoñ meñ rakhe
pūchhte kyā ho miyāñ! makkār duniyā ho ga.ī

be-hayā.ī bevafā.ī be-yaqīnī be-hisī
kaise kaise ḳhanjaroñ kī dhaar duniyā ho ga.ī

maslahat ne kis qadar tabdīl us ko kar diyā
ġhair maiñ huuñ in dinoñ ġham-ḳhvār duniyā ho ga.ī

kyā samajhte ho yaqīñ kar legī tum kuchh bhī kaho
soch kar denā bayāñ hoshyār duniyā ho ga.ī

kyā sahāfī kyā muarriḳh kaise aalim kyā adiib
dekhte hī dekhte bāzār duniyā ho ga.ī