Tags-Duniya

maiñ jāntā huuñ ki duniyā tujhe badal degī
maiñ māntā huuñ ki aisā nahīñ ba-zāhir tū

zikr jab hogā mohabbat meñ tabāhī kā kahīñ
yaad ham ā.eñge duniyā ko havāloñ kī tarah

phir kho na jaa.eñ ham kahīñ duniyā kī bhiiḌ meñ
miltī hai paas aane kī mohlat kabhī kabhī

hamī ko shauq thā duniyā ke dekhne kā bahut
ham apnī āñkhoñ meñ ḳhud sūiyāñ chubhote rahe

havas kī zad pe taḌaptī sisaktī duniyā meñ
vaqār apnā bachānā hai kyā kiyā jaa.e

duniyā bhī pesh aa.ī bahut be-ruḳhī ke saath
ham ne bhī zaḳhm khaa.e baḌī sādgī ke saath

dil hī kī ḳhudā.ī hai yahāñ aaj bhī ai dost
pāband-e-nazar kaif kī duniyā to nahīñ hai

vo ajab duniyā ki sab ḳhanjar-ba-kaf phirte haiñ aur
kāñch ke pyāloñ meñ sandal bhīgtā hai saath saath

mar ke jaanā hai kahāñ mujh ko nahīñ ye ma.alūm
rah ke duniyā meñ koī kaam to kar jā.ūñgā

maiñ to baḌhtā hī rahūñgā rah-e-haq meñ ai 'nūr'
kyuuñ samajhtī hai ye duniyā ki maiñ Dar jā.ūñgā

maiñ nādānī pe apnī aaj tak hairān huuñ 'dānā'
ki duniyā ko samajhne kī samajhdārī nahīñ aa.ī

āsān bhī hai dushvār bhī hai dukh-sukh kā baḌā bāzār bhī hai
mālūm nahīñ to mujh se suno ye duniyā divānī kaam kī hai

jaane maiñ kaun thā logoñ se bharī duniyā meñ
merī tanhā.ī ne shīshe meñ utārā hai mujhe

ai dil ab aur koī qissa-e-duniyā na sunā
chheḌ de zikr-e-vafā haañ koī afsāna sunā

mirī gum-gashtagī mere liye chhat ban ga.ī varna
ye duniyā vaale mujh ko be-Thikāna karne vaale the

pur-kashish hai mahfil-e-duniyā bahut apnī jagah
par mujhe ye apnī jānib kar sakī maa.il kabhī

sun rahā huuñ ki mayassar hī nahīñ duniyā meñ
ik nigah rāz-e-do-ālam jo batā de saaqī

abhī ḳharīd leñ duniyā kahāñ kī mahñgī hai
magar zamīr kā saudā burā sā lagtā hai

vahī duniyā ulaT dete haiñ 'shārib'
jo aksar kuchh nahīñ kahte zabāñ se

hai yaad mujhe nukta-e-salmān-e-ḳhush-āhañg
duniyā nahīñ mardān-e-jafā-kash ke liye tañg