Tags-Duniya

nigāh-e-dahr meñ ahl-e-kamāl ham bhī hoñ
jo likh rahe haiñ vo duniyā agar dikhā.ī de

duniyā o āḳhirat meñ talabgār haiñ tire
hāsil tujhe samajhte haiñ donoñ jahāñ meñ ham

ye merī haqīqat hai ye merī shanāsā.ī
maiñ ek tamāshā huuñ duniyā hai tamāshā.ī

ahl-e-duniyā meñ mo.assir hai har ek shai kā rivāj
mast ho jā.eñge sab daur-e-muġhāñ hone do

hañse bhī ro.e bhī lekin na samjhe
ḳhushī kyā chiiz hai duniyā meñ ġham kyā

kār-e-duniyā ke taqāzoñ ko nibhāne meñ kaTī
zindagī ret kī dīvār uThāne meñ kaTī

paidā nahīñ duniyā meñ davā-e-maraz-e-ishq
kyā log na hote the is āzār ke aage

aisī duniyā meñ kab tak guzārā kareñ tum hī kah do ki kaise gavārā kareñ
raat mujh se mirī bebasī ne kahā bebasī ke liye ek taaza ġhazal

duniyā ko zid numā.ish-e-zaḳhm-e-jigar se thī
fariyād maiñ ne kī na zamāna ḳhafā huā

merī raa.e meñ 'iqbāl' vo nasl duniyā meñ hai aur nahīñ
jis ne baḳhshā na kuchh vaqt ko jis ne paayā na kuchh dahr se

duniyā kā hai ujālā patthar
yazdāñ terā kaalā patthar

purānī ho ga.ī duniyā use mismār karnā hai
na.ī ta.amīr kī ḳhātir na.ī buniyād rakkheñge

saḌkoñ ke chaurāhoñ par jin ko tanhā.ī ghere ho
us sīmābī duniyā meñ kyuuñ jiine kā armān kareñ

bāhar kī duniyā meñ jin ko jins-e-vafā nāyāb lage
apne andar ke but-ḳhānoñ ko pahle vīrān kareñ

ḳhud pe sau jabr kiye dil ko bahut samjhāyā
raas aa.ī kahāñ duniyā hameñ āsānī se

ham is duniyā meñ rah kar āḳhirat kī baat karte haiñ
hameñ to ye zamīñ ab āsmāñ ma.alūm hotī hai

hai un kā mo.ajiza ye rahmatullilālamīñ honā
ye duniyā raunaq-e-kaun-o-makāñ ma.alūm hotī hai

duniyā ke saath diin kī begār al-amāñ
insān aadmī na huā jānvar huā

kahāñ kī duniyā kahāñ kī sāñseñ ki sab fareb-e-havās niklā
jazā kī muddat samajh rahā thā sazā kī mohlat meñ aa basā huuñ

is tarah tujhe ishq kiyā hai ki ye duniyā
ham ko hī kahīñ ishq kā hāsil na banā de