Tags-Duniya

duniyā se kaun jaatā hai apnī ḳhushī ke saath
vābasta ho agar na azal zindagī ke saath

sīna-e-sozāñ meñ 'sāqib' ghuT rahā hai vo dhuāñ
uf karūñ to aag duniyā kī havā dene lage

sabab har ek mujh se pūchhtā hai mere hone kā
ilāhī saarī duniyā ko maiñ kyuuñ kar rāz-dāñ kar luuñ

ye mai-kada to hai ḳhud inqalāb kī duniyā
yahāñ jamegā na duniyā ke inqalāb kā rañg

koī to ho is jahāñ meñ aisā
ki jis ke bas meñ ho saarī duniyā

hastī ke bhayānak nazzāre saath apne chale haiñ duniyā se
ye ḳhvāb-e-pareshāñ aur ham ko tā-sub.h-e-qayāmat sonā hai

tamām duniyā simaT na jaa.e mirī hadoñ meñ
ki had se baḌhne lagā hai ab intishār merā

vaqt ko haath se kho kar koī duniyā meñ 'hafīz'
umr-bhar merī tarah sar-ba-garebāñ na rahā

vīrān sī is duniyā meñ ham kis se bahalte
jañgal thā udāsī thī koī mor nahīñ thā

dil TuuT gayā thā to juḌāte kahīñ jā kar
is kaam kā duniyā meñ koī taur nahīñ thā

zaq-zaq-o-baq-baq meñ duniyā ke na ho 'akbar' sharīk
chup hī rahne par zabān-e-tez ko raazī karo

sho.abada duniyā kā kam fursat bahut hai juuñ hubāb
zindagī hai tā-zamāna va.ada-e-iqrār tak

sabhī haiñ mubtalā-e-ḳhud-farebī
ajab duniyā kā manzar dekhtā huuñ

kitāb the to paḌhe jā sake na duniyā se
lo ab charāġh hue rahguzar meñ ham bhī haiñ

āsebī sī sham.eñ le kar sayyāroñ meñ ghuum ga.ī
koī havā aisī hai ki duniyā niiñd meñ uTh kar chaltī hai

raat kī raat Thaharne vaale vaqt-e-ḳhush kī baat samajh
sub.h to ik darvāza-e-ġham par duniyā āñkheñ maltī hai

shams o qamar kī ḳhākistar meñ ruuh thī ik ārā.ish kī
duniyā biich meñ jā ke khaḌī hai aur libās badaltī hai

vafā ke bol par be-mol bik jaatī hai ye duniyā
agar ho be-sar-o-sāmāñ to ye sikke khare rakhiyo

ham se to rāh-o-rasm hai aġhyār kī tarah
duniyā pe mehrbān haiñ ġham-ḳhvār kī tarah

kyā nahīñ kaj-aks ā.īnoñ kā duniyā meñ ilaaj
jis ko dekho hai ajab mahv-e-ḳhud-ārā.ī ki bas