Tags-Duniya

har zarra hai jamāl kī duniyā liye hue
insāñ agar ho dīda-e-bīnā liye hue

dūsroñ kā dard 'aḳhtar' mere dil kā dard hai
mubtalā-e-ġham hai duniyā aur maiñ ġham-ḳhvār huuñ

bikhar jā.ūñ to ḳhud hī hai simaTnā
ki ye duniyā tamāshā.ī bahut hai

DhūñDhtī hai iztirāb-e-shauq kī duniyā mujhe
aap ne mahfil se uThvā kar kahāñ rakkhā mujhe

tamām vahm o gumāñ hai to ham bhī dhoka haiñ
isī ḳhayāl se duniyā ko maiñ ne pyaar kiyā

ise bachchoñ ke hāthoñ se uThāo
ye duniyā is qadar bhārī nahīñ hai

chhoḌ kar jaate ho ghar 'ma.asūm' sāhab
soch lo duniyā yahī chāroñ taraf hai

ye duniyā nafratoñ ke āḳhrī stage pe hai
ilaaj is kā mohabbat ke sivā kuchh bhī nahīñ hai

dete nahīñ sujhā.ī jo duniyā ke ḳhatt-o-ḳhāl
aa.e haiñ tīrgī meñ magar raushnī se ham

baat alag hai fāqa-mast faqīroñ kī
Thokar meñ duniyā kī daulat rakkhī hai

safar bahut mushkil hai paapī duniyā kā
izzat ke pīchhe hī zillat rakkhī hai

vo zinda dil thā maiñ sahtā rahā ġham-e-duniyā
usī meñ jaan dī lekin gurez-pā na huā

shā.irī aur adab kī duniyā meñ
kaun hai bā-kamāl mat pūchho

jazbāt bhī hindū hote haiñ chāhat bhī musalmāñ hotī hai
duniyā kā ishāra thā lekin samjhā na ishāra dil hī to hai

bāġh-e-duniyā meñ yūñhī ro hañs ke kāTūñ chaar din
zindagī hai shabnam o gul kī tarah faanī mirī

kyā tarjumānī-e-ġham-e-duniyā kareñ ki jab
fan meñ ḳhud apnā ġham bhī samoyā na jā sakā

maiñ saarī duniyā ko apnā hī ghar samajhne lagūñ
na koī shahr ho merā na shahriyat merī

na rāz-e-ibtidā samjho na rāz-e-intihā samjho
nazar vāloñ tumheñ karnā hai ab duniyā meñ kyā samjho

jise dekho vahī badmast hī maġhrūr hai hamdam
koī banda nahīñ duniyā meñ kis kis ko ḳhudā samjho

'ġhālib' bhī gar na ho to kuchh aisā zarar nahīñ
duniyā ho yā rab aur mirā bādshāh ho