Tags-Duniya

dekhā na tujhe ai rab ham ne haañ duniyā terī dekhī hai
saḌkoñ par bhūke bachche bhī koThe par abla naarī bhī

duniyā se uTh chukā thā mohabbat kā e'tibār
qaa.em kiye hue hai bharam kaun ham ki aap

vo zindagī ho ki duniyā 'farāz' kyā kiije
ki jis se ishq karo bevafā nikaltī hai

jo tūfānoñ meñ palte jā rahe haiñ
vahī duniyā badalte jā rahe haiñ

yuuñ to har shaḳhs akelā hai bharī duniyā meñ
phir bhī har dal ke muqaddar meñ nahīñ tanhā.ī

duniyā huī ābād to mere hī sabab se
anjām na de paa.e koī kaam farishte

maiñ ek gunāhgār nasīhat kā hadaf huuñ
duniyā meñ bhī milte haiñ bahar-gām farishte

mujh par surūr chhā gayā bāda-e-dil-navāz se
duniyā mirī badal ga.ī ek nigāh-e-nāz se

tīsrī duniyā munavvar ho mire afkār se
mehr-e-āzādī mire ehsās ke andar nikal

abhī hote agar duniyā meñ 'dāġh'-e-dehlavī zinda
to vo sab ko batā dete hai 'vahshat' kī zabāñ kaisī

bandagī kījiye magar kis kī
hai bhī duniyā meñ koī banda-navāz

tere ġham se kiyā duniyā ke ġhamoñ kā chāra
yaanī ik ḳhaar se sab ḳhaar nikāle maiñ ne

DhūñDhnā hogā ḳhad-o-ḳhāl kī duniyā meñ jise
pahle us shaḳhs kī tasvīr banā lī jaa.e

chhoḌ tum kuuñ aur kis señ ham mileñ
kaun hai duniyā meñ kui tum sā sajan

asnām-e-māl-o-zar kī parastish sikhā ga.ī
duniyā mujhe bhī ābid-e-duniyā banā ga.ī

go dil ke badle daulat-e-duniya-o-dīñ milī
to bhī ye jins haath se sastī chalī ga.ī

mire qadmoñ meñ duniyā ke ḳhazāne haiñ uThā luuñ kyā
zamāna gir chukā jitnā maiñ ḳhud ko bhī girā luuñ kyā

kaun sī kashtī meñ baiTheñ tire bande maulā
ab jo duniyā koī sailāb uThā kar le aa.e

ḳhvāb meñ lazzat-e-yak-ḳhvāb hai duniyā merī
aur mire falsafī asbāb uThā kar le aa.e

mujh se to kisī se bair na thā duniyā mire ḳhuun kī pyāsī hai
maqtal kī taraf se jo guzrā ik haath lahū meñ saan liyā