Tags-Duniya

kaun sī duniyā meñ huuñ kis kī nigahbānī meñ huuñ
zindagī hai saḳht mushkil phir bhī āsānī meñ huuñ

maut kī zad kā ḳhatar har fard ko har ghar meñ hai
ye baḌā ik aib ai duniyā tirī chausar meñ hai

chhilkoñ ke haiñ ambār magar maġhz nadārat
duniyā meñ musalmāñ to haiñ islām nahīñ hai

tum sāda-mizājī se miTe phirte ho jis par
vo shaḳhs to duniyā meñ kisī kā bhī nahīñ hai

vā.izāñ muzhda ki jannat meñ bahār aa.ī hai
merī duniyā se ḳhizāñ lauT ke jaa.e to bane

Dālte haiñ ahl-e-duniyā ḳheme ab sahrā ke biich
faut-e-majnūñ se hai be-vāris bayābāñ al-ayāz

aisī pyaas kī shiddat hai ki maiñ ye duā.eñ kartā huuñ
jitne samundar haiñ duniyā meñ sab kī bārish ho jaa.e

agar had se guzar jaa.e davā to ban nahīñ jaatā
kisī bhī dard ko duniyā kā darmāñ ham nahīñ kahte

khoj rahā hai aaj bhī vo gūlar kā phuul
duniyā to afvāh uḌā kar baiTh ga.ī

ab ke charāġhoñ ne chauñkāyā duniyā ko
āñdhī āḳhir meñ jhunjhlā kar baiTh ga.ī

duniyā kā maal muft meñ chakhne ke vāste
haath aayā ḳhuub shaiḳh ko hiila namāz kā

ab kisī baat meñ bhī jī nahīñ lagtā merā
dil meñ aa baiThī thī jo ḳhvāhish-e-duniyā ga.ī kyā

hādī-e-dīn jitne bhī aa.e yahāñ saarī duniyā ko un kā ye paiġhām thā
nahīñ insāniyat jis meñ insāñ nahīñ jis meñ insāniyat hai vo insān hai

krishn aa.e yahāñ aa.e munjī yahāñ nānak aa.e yahāñ aa.e rusul-e-ḳhudā
sabhī ik dūsre se mohabbat kareñ saarī duniyā ko un kā ye farmān hai

ik qabīle se haiñ lekin rañg-o-naqsha aur hai
aur hai kāñToñ kī duniyā gul kī duniyā aur hai

aur hī manzar hai duniyā kā sar-e-tūr-e-nazar
chashm-e-dil ke sāmne lekin tamāshā aur hai

ab badalnā hī paḌegā ye tarīq-e-zindagī
ab mirī jaañ sūrat-e-hālāt-e-duniyā aur hai

duniyā jise kahte haiñ jaadū kā khilaunā hai
mil jaa.e to miTTī hai kho jaa.e to sonā hai

mujhe aish o ishrat kī qudrat nahīñ hai
karūñ tark-e-duniyā to himmat nahīñ hai

mire sar pe zālim na laayā ho jis ko
koī aisī duniyā meñ aafat nahīñ hai