Tags-Duniya

aañkh band hote hī mujh par khul gayā rāz-e-hayāt
ziist ko duniyā meñ umr-e-jāvedāñ samjhā thā maiñ

milā huuñ aaj maiñ tujh se to vasvase ye tamām
miTe ḳhayāl kī duniyā se misl-e-naqsh-bar-āb

ye ḳhazāne kā koī saañp banā hotā hai
aadmī ishq meñ duniyā se burā hotā hai

ruḳh-e-raushan ko be-naqāb na kar
dil kī duniyā meñ inqalāb na kar

ye rañj-o-alam hī mere liye ab ziist kā unvāñ haiñ hamdam
is duniyā meñ pahle pahle har kaam hī mushkil hotā hai

dil to duniyā se nikalne pe hai āmāda magar
ik zarā zehn ko tayyār kiyā jaanā hai

sāhil pe agar mirā safīna aa jaa.e
duniyā tujhe jiine kā qarīna aa jaa.e

khultī nahīñ hai mujh par ye duniyā
dil meñ nahīñ sī āñkhoñ meñ hai sī

detā hai tark-e-duniyā kī dāvat
'jāved' kī to aisī-kī-taisī

kamāl-e-hirs hai jazb-o-talab kī duniyā meñ
badan ko ruuh kī āvāz se judā rakhnā

shikast-o-reḳht kī duniyā meñ zinda rahne kī
bikhar bikhar ke simaTne kā hausla rakhnā

zāl-e-duniyā hai ajab tarah kī allāma-e-dahr
mard-e-dīñ-dār ko bhī dahriya kar detī hai

ab nahīñ tere do-ālam kī zarūrat mujh ko
ishq ne tere basā dī na.ī duniyā dil meñ

maiñ kyā bhalā thā ye duniyā agar kamīnī thī
dar-e-kamīngī pa chobdār maiñ bhī thā

anjām ḳhushī kā duniyā meñ sach kahte ho ġham hotā hai
sābit hai gul aur shabnam se jo hañstā hai vo rotā hai

tirī duniyā jahān-e-murġh-o-māhī
mirī duniyā fuġhān-e-sub.h-gāhī

jab zulm ke tūfāñ umḌe haiñ jab yaas ke bādal chhā.e haiñ
duniyā ko diyā hai azm-e-javāñ tārīḳh ko ham ne moḌ diye

bahut shaffāf the jab tak ki masrūf-e-tamannā the
magar is kār-e-duniyā meñ baḌe dhabbe lage ham ko

maiñ ki tere dhyān meñ gum thā
duniyā mujh ko DhūñDh rahī thī

taufīq se kab koī sarokār chale hai
duniyā meñ faqat tāla-e-bedār chale hai