Tags-Duniya

jab bhī ḳhālī haath the aur ab bhī ḳhālī haath haiñ
le ke ham duniyā meñ kyā aa.e the kyā le kar chale

mahfil-e-duniyā ko Thukrā duuñ magar
jalva-farmā haiñ tirī ra.anā.iyāñ

hai masā.il se ab vahī uljhā
rishta joḌā hai jis ne duniyā se

aflāk kī gardish se dam-bhar duniyā meñ hameñ ārām nahīñ
vo din nahīñ vo ab raat nahīñ vo sub.h nahīñ vo shaam nahīñ

abhī imkān ke safhe bahut ḳhālī haiñ duniyā meñ
mujhe bhī ek nauha jā-ba-jā tahrīr karnā hai

kaan pak jaate haiñ duniyā kī shikāyat sun kar
kis ne jaanā hai tumheñ kis kā yaqīñ kar luuñ maiñ

tū nahīñ phir bhī chalā kartī hai duniyā merī
ab to mahsūs nahīñ hotī kabhī terī kamī

har zarra hai jamāl kī duniyā liye hue
insāñ agar ho dīda-e-bīnā liye hue

kaam duniyā kā hai tīr-andāzī
ham hue yā koī naḳhchīr huā

fāsiq jo agar āshiq-e-dīvāna huā to kyā
duniyā ke matālib ko farzāna huā to kyā

dard meñ Duubā kaise likkhūñ duniyā kā afsāna
'amjad' jab bhī qalam uThā.ūñ aañkh meñ aañsū aa.e

purāne ahd TuuTe ho ga.e paimāñ na.e qaa.em
banā dī us ne duniyā dūsrī jo inqalāb aayā

kyā kis se gilā kījiye ḳhud ham nahīñ apne
duniyā kā 'zahīr' in dinoñ kyā haal huā hai

dil-e-begāna ḳhud duniyā meñ terā
koī hamdam koī hamrāz bhī hai

isī liye nahīñ sote haiñ ham ki duniyā meñ
shab-e-firāq kī sauġhāt sab meñ baT jaa.e

chehra dikhā gayā hai mujhe duniyā kā koī
shīsha dikhā ke apnoñ kī pahchān de gayā

duniyā kā ḳhuun daur-e-mohabbat meñ hai safed
āvāz aa rahī hai lab-e-jū-e-shīr se

chalo is tarah se sajā.eñ use
ye duniyā hamārī tumhārī lage

ek zamāne meñ jab ham tum donoñ hī joshīle the
is duniyā ke saare mausam ThanDe the barfīle the

vo jis ko saarī duniyā kī ḳhudā ne baḳhsh dī daulat
usī ke ghar mirā khoyā huā kāñsā nikal aayā