Tags-Duniya

ye ḳhuun aur pasīne kī bū nahīñ jaatī
na jaane kis ke badan kā libās hai duniyā

hamāre halq se ik ghūñT bhī nahīñ utrī
bas ek aur hī duniyā kī pyaas hai duniyā

mire qalam kī siyāhī kā ek qatra hai
mirī kitāb se ik iqtibās hai duniyā

maiñ ne duniyā tirī taḳhlīq pe sochā thā bahut
rāz-e-gum-gashta-e-mahbūb ayaañ tak na huā

ye baat alag hai kisī dhāre pe nahīñ hai
duniyā kisī kamzor ishāre pe nahīñ hai

ġharq ho jaatī hai jab niiñd meñ saarī duniyā
jaag uThte haiñ adīboñ ke qalam raat ga.e

is duniyā meñ apnī ḳhātir ik lamha bhī ḳhushiyoñ kā nahīñ
fariyād ki bas ab ham hī haiñ jo rañj pe rañj uThāte haiñ

is daur ke baad jo daur nayā duniyā meñ aane vaalā hai
ham 'rājas' chup kī pastī meñ us daur ke naġhme gaate haiñ

husn-e-urūs-e-gul ki jamāl-e-saman-barāñ
duniyā meñ kuchh bhī zauq-e-nazar ke sivā nahīñ

saare duniyā meñ qātil-o-maqtūl
apnā apnā mizāj rakhte haiñ

āñkheñ mal mal kar dekheñge ḳhvāb hai kyā
aise rañg dikhā.egī duniyā ik din

mire dil ke kisī kone meñ ik ma.asūm sā bachcha
baḌoñ kī dekh kar duniyā baḌā hone se Dartā hai

ajab ye zindagī kī qaid hai duniyā kā har insāñ
rihā.ī māñgtā hai aur rihā hone se Dartā hai

be-hisī kī duniyā se do savāl mere bhī
kab talak jiyā jaa.e aur kyoñ jiyā jaa.e

āfāt-o-havādis se bharī hai duniyā
dukhḌoñ se ġharaz paTī paḌī hai duniyā

rahtā huuñ 'firāq' is liye vārafta ki duniyā
kuchh hosh meñ aa jaa.e mirī be-ḳhabarī se

jise duniyā ne bas aañsū hī jaanā
farastāda thā ik dil ke nagar kā

bach ke duniyā se ghar chale aa.e
ghar se bachne magar kidhar jaa.eñ

pārsā duniyā meñ koī bhī nahīñ
aadmī saare ḳhatā karte haiñ

ab to ġhazloñ ke havāle se tirā
zikr duniyā se kiyā karte haiñ