Tags-Duniya

kab tak saath nibhātā āḳhir
vo bhī duniyā meñ rahtā hai

samajhtī hai yahī duniyā ki mujh ko
mohabbat meñ ḳhasāra ho rahā hai

ab apnī haqīqat bhī 'sāġhar' be-rabt kahānī lagtī hai
duniyā kī haqīqat kyā kahiye kuchh yaad rahī kuchh bhuul ga.e

kam se kam duniyā se itnā mirā rishta ho jaa.e
koī merā bhī burā chāhne vaalā ho jaa.e

aaj duniyā kī nigāheñ āsmāñ par haiñ lagī
donoñ aalam par abhī tak chhā ke ham chup-chāp haiñ

phir 'anīs' mimber par marsiya paḌheñ aa kar
karbalā ye duniyā hai har ghaḌī shahādat hai

merī raa.e pūchho to ye burī-bhalī duniyā
aap jitne achchhe haiñ utnī ḳhūb-sūrat hai

arz-e-alam ba-tarz-e-tamāshā bhī chāhiye
duniyā ko haal hī nahīñ huliya bhī chāhiye

jo dil kī baat thī vahī lafzoñ meñ Dhaal dī
duniyā samajh rahī hai ki taḳhlīq-kār huuñ

raas aa.ī hai na aa.egī ye duniyā lekin
rok rakkhā hai mujhe kuuch kī tayyārī ne

tum ne duniyā kī tarah aañkh firā.ī hai to kyā
ye bhī ik jabr isī dil pe sahā hai maiñ ne

vo jo duniyā kī haqīqat ko samajh le insāñ
apnī manzil kī taraf sīna-sipar jaatā hai

pūchh na 'fāzil' mirī duniyā kā rañg
aag har ik samt dhuāñ duur tak

na jaane kyuuñ tumhāre ġham ko duniyā ġham samajhtī hai
masarrat se to is kā martaba kuchh kam nahīñ hotā

haiñ aur bhī duniyā meñ suḳhan-var bahut achchhe
kahte haiñ ki 'ġhālib' kā hai andāz-e-bayāñ aur

duniyā meñ yūñhī raunaq-e-pindār rahegī
kāñdhoñ pe mire sar hai to dastār rahegī

duniyā samajh rahī thī ki nārāz mujh se hai
lekin vo jab milā to mujhe sochnā paḌā

bahār-e-sabza-o-gul hai karam hotā hai saaqī kā
javāñ hotī hai duniyā mai-kada ābād hotā hai

bulbule sat.h-e-āb ko chhū kar
ham ko duniyā kā de ga.e naqsha

shikast-e-zāt se le kar shikast-e-duniyā tak
hue haiñ dard bhī kitne baham mohabbat meñ