Tags-Duniya

kyuuñ muqayyad huuñ zaat meñ apnī
jabki duniyā se dil lagātā huuñ

baare duniyā meñ raho ġham-zada yā shaad raho
aisā kuchh kar ke chalo yaañ ki bahut yaad raho

is tarah bāb-e-nasīhat khol kar baiThe haiñ log
jaise ḳhair o shar kā duniyā meñ koī me.aar hai

na koī dard-āshnā na hamdam na koī soz-e-darūñ kā mahram
hameñ yahāñ ajnabī haiñ jaane ki saarī duniyā na.ī na.ī hai

is bhuuk ke dukh kī duniyā meñ
ye kaisā sukh kā sapnā hai

kyā karoge 'asad' ise le kar
jab ye duniyā habāb kī sī hai

duniyā se kyā matlab mujh ko aalam se kyā tujh ko ta.alluq
merā dilbar terā shaidā maiñ hī maiñ huuñ tū hī tū hai

tū hī tū hai maiñ hī maiñ huuñ aalam meñ aalam se nirālā
duniyā meñ duniyā se anokhā maiñ hī maiñ huuñ tū hī tū hai

dil na tujhe lenā thā mujh se jaan mujhe denī thī na tujh par
kaisā duniyā bhar meñ rusvā maiñ hī maiñ huuñ tū hī tū hai

collage kā dālān nahīñ hai pyāre zālim duniyā hai
aur yahāñ sach bolne vaalā sach meñ sab se jhūTā hai

agar shu.ūr na ho to bahisht hai duniyā
baḌe azaab meñ guzrī hai āgahī ke saath

ghar ke sab darvāze kyuuñ dīvār hue haiñ
ghar se bāhar duniyā saarī chīḳh rahī hai

ganj-e-qārūñ ke sivā bhī hai adam meñ sab kuchh
haa.e duniyā meñ na is mulk kā hāsil aayā

diin o duniyā se gayā to ye samajh le ai 'dāġh'
ġhazab aayā agar us but pe tirā dil aayā

jaan de deñge agar duniyā ne rokā rāsta
aur koī hal na niklā ham ne to sochā bahut

ibtidā ye thī ki duniyā bhar kī nazreñ ham pe thiiñ
intihā ye hai ki ḳhud se bhī na pahchāne ga.e

duniyā ne ham ko jaur-o-jafā de diye 'ayāz'
is daad ke evaz meñ ye fan māñgtī rahī

kyuuñ na phāñse daulat-e-duniyā hameñ
hai vahāñ par daam jis jā daana hai

thī ek rasm-e-ishq so ham ne bhī kī adā
duniyā meñ koī kaam anokhā na kar sake

dost ḳhush hote haiñ jab dost kā ġham dekhte haiñ
kaisī duniyā hai ilāhī jise ham dekhte haiñ