Tags-Duniya

ham sab haiñ rāhgīr tasādum kā kyā sabab
duniyā hai shāhrāh kuchh aisī galī nahīñ

mujhe ik aisī duniyā bhī basānī hai jahāñ 'shahzād'
kisī ko bhī kisī kī hukmarānī meñ nahīñ rahnā

dhotā hai suḳhan dil se ġhubār-e-ġham-e-duniyā
hai gard-e-alam ke liye sāvan kī jhaḌī baat

is mohabbat ko na lag jaa.e kahīñ koī nazar
ham ko duniyā kī nigāhoñ se bhī Darnā hogā

duniyā tujhe chāhe kuchh bhī kahe ham jān-e-tamannā kahte haiñ
ham terī nazar meñ ġhair sahī phir bhī tujhe apnā kahte haiñ

tū laakh chhupā.e ishq magar chehre se ayaañ ho jaatā hai
kahne vaale to duniyā meñ mujhe aaj bhī terā kahte haiñ

aise bhī bānī-e-be-dād haiñ kuchh duniyā meñ
falak-e-pīr bhī detā hai jinheñ jhuk ke ḳhirāj

kisī kī bhī nahīñ hotī ye duniyā
ki is kī zaat hai bad-zāt vaalī

ik haath thā duniyā kā mirī jeb pe 'shāhīñ'
jo dūsrā thā mere garebāñ kī taraf thā

daar ne ik sag-e-duniyā ko ye baḳhshā hai uruuj
hai farishtoñ meñ bhī charchā mirī dīñ-dārī kā

payambar dard kā ban ke tū gar duniyā meñ aa.egā
sahīfa ban ke ashkoñ kā maiñ nāzil ho hī jā.ūñgā

jaane kyā chiiz mohabbat kī nazar hotī hai
vo jidhar hote haiñ duniyā hī udhar hotī hai

saḌī dīvāna saudā.ī jo chāhe so kahe duniyā
haqīqat-bīñ magar 'majzūb' ko aaqil samajhte haiñ

binā-e-mausam-e-ġham-hā-e-zāt hai duniyā
ise tū rashk-e-iram likh ki shāḳh-e-tūbā likh

kis ke aage dard-e-dil apnā kahoge tum 'shafaq'
koī duniyā meñ nahīñ ab qadr-dān-e-ahl-e-dard

gaahe gaahe hī sahī 'amjad' magar ye vāqi.a
yuuñ bhī lagtā hai ki duniyā kā ḳhudā koī nahīñ

sāmne hashr nazar aatā hai lekin duniyā
ḳhvāb-e-ġhaflat meñ abhī soī huī lagtī hai

na muḌ ke dekhegī duniyā maro na ghuT ghuT ke
ye hādsoñ pe hī bas chauñkne kī aadī hai

jo talab-nā-āshnā ho mā-sivā ke sāmne
haath phailātī hai duniyā us gadā ke sāmne

dil ne har daur meñ duniyā se baġhāvat kī hai
dil se tum rasm-o-rivāyāt kī bāteñ na karo